سەرۆک بافڵ: بڕوای تەواومان بە هەماهەنگی و کاری پێکەوەیی هەیە

نوسینگەی رۆژنامەوانی سەرۆکی یەکێتی

کۆبوونەوەی سەرۆکی یەکێتی و کونسوڵی گشتیی کۆماری ئەرمینیا لە ھەرێمی کوردستان

بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە ئارشاک مانۆکیان، کونسوڵی گشتیی کۆماری ئەرمینیا لە ھەرێمی کوردستان کرد.

لەدیدارەکەدا پەرەپێدانی پەیوەندییەکان و فراوانکردنی هەماهەنگییەکانی نێوان هەرێم و ئەرمینیا لەچوارچێوەی بەرژەوەندییە گشتییەکاندا جەختیلێکرایەوە.

دۆخی هەرێم و بەڕێوەچوونی هەڵبژاردن تەوەرێکیتری گفتوگۆکان بوو و لەوبارەیەوە سەرۆک بافڵ جەلال تاڵەبانی ئاماژەی بە هەوڵەکانی یەکێتی کرد بۆ چارەسەرکردنی کێشەکان و پاراستنی یەکڕیزیی کورد و رایگەیاند، بڕوای تەواومان بە هەماهەنگی و کاری پێکەوەیی هەیە، ناشمانەوێت هیچ بڕیارێک لەدەرەوەی کۆدەنگیی نیشتمانی بدەین. وتیشی، لەگەڵ لایەنە سیاسییەکانیشدا لە هەوڵداین تاوەکو بەربەستەکان نەهێڵین و زەمینەیەکی لەبار بۆ بەڕێوەچوونی هەڵبژاردنێکی بێگەرد بڕەخسێنین.