فراكسیۆنی یەكێتی دەرمان بۆ نەخۆشییە درێژخایەنەكانی گەرمیان دەستەبەر دەكات

PUKMEDIA

نەخۆشخانەی گشتی كەلار

لەسەر داوای فراكسیۆنی یەكێتی لە ئەنجومەنی نوێنەرانی عیراق دەرمانی پێویست بۆ نەخۆشانی نەخۆشییە درێژخایەنەكانی گەرمیان دابینكرا.

كاروان یاروەیس ئەندامی ئەنجومەنی نوێنەرانی عیراق لە فراكسیۆنی یەكێتی لە لێدوانێكیدا بۆ سایتی رەسمی یەكێتیی نیشتمانیی كوردستان PUKMEDIA رایگەیاند: "لەسەر داوای فراكسیۆنی یەكێتی و لەرێگای نوێنەرمان د.گەیلان قادر لە لیژنەی تەندروستی ئەنجومەنی نوێنەران، بەسوپاسەوە وەزیری تەندروستی عیراق رەزامەندی لەسەر ناردنی بەشێك لە دەرمانی نەخۆشانی درێژخایەن بۆ نەخۆشخانەكانی گەرمیان دەربڕی".

" دەرمانەكە بۆ سەرجەم نەخۆشخانەكانی گەرمیان، دەربەندیخان، كەلار، كفری-یە و بەپێی لیستێك دەنێردرێت كە ئیدارەی نەخۆشخانەی گشتی كەلار دیاریكردووە و بەشی سەرجەم نەخۆشانی نەخۆشییە درێژخایەنەكان لە گەرمیان دەكات و ناچار نابن لە بازاڕ بە نرخێكی گران دەرمان بكڕن" كاروان یاروەیس وادەڵێت.

ئەمەش لە كاتێكدایە، پێشتر هەر لەسەر داوای فراكسیۆنی یەكێتیی نیشتمانیی كوردستان لە ئەنجومەنی نوێنەرانی عیراق، لەلایەن وەزارەتی تەندروستی عیراقەوە دەرمانی نەخۆشی هەوكردنی مێشك بۆ كەلار و دەرمانی پێویست بۆ نەخۆشخانەی چەمچەماڵ دابینكراوە.

PUKMEDIA