قوباد تاڵەبانی پڕۆژەی شەقامی ١٠٠ مەتری سلێمانی بەسەرکردەوە

PUKMEDIA

سەردانی قوباد تاڵەبانی بۆ پڕۆژەی شەقامی ١٠٠ مەتری سلێمانی

دوای ئەوەی دوێنێ دووشەمە ١٤ ئابی ٢٠٢٣ پرۆسەی قیرتاوکردنی شەقامی ١٠٠ مەتری دەستی پێکرد، ئەمڕۆ قوباد تاڵەبانی جێگری سەرۆک وەزیران سەردانی پڕۆژەکەی کرد و لە نزیکەوە لە چۆنییەتی بەرەوپێشچوونی قۆناغەکانی جێبەجێکردنی پڕۆژەکەی کۆڵییەوە.

جێگری سەرۆک وەزیران دەستخۆشی لە شارەوانی سلێمانی کرد بۆ کارئاسانیکردن وهەماهەنگییەکانی لەگەڵ کۆمپانیای جێبەجێکار و هەروەها دەستخۆشی لە کۆمپانیای جێبەجێکار و ئەندازیاران و کرێکارانی پڕۆژەکەش کرد کە لە ماوەی رابردوو سەرباری کێشە و کەموکوڕییەکان بەردەوام بوون لە کارەکانیان.

دوای ئەوەی لە کێشە و گرفتەکانی کۆڵییەوە، قوباد تاڵەبانی رایگەیاند پڕۆژەی شەقامی ١٠٠ مەتری پڕۆژەیەکی ستراتیژییە و هەموو هەوڵێک دەدەن کەموکوڕییەکان چارەسەر بکەن و داواشی لە شارەوانی سلێمانی و کۆمپانیای جێبەجێکار کرد هەموو هەوڵی خۆیان بخەنەگەڕ تا پڕۆژەکە لە ماوەیەکی کورتدا تەواو بکرێت.

شەقامی ١٠٠ مەتری سلێمانی ٣٤ کیلۆمەترە و تا ئێستا ٩٥٪ کارەکانی پڕۆسەی بڕین و پڕکردنەوەی تەواو بوو و بە گشتیش ٥٥٪ کۆی پڕۆژەکە تەواو بووە. لە رۆژی رابردووشەوە پرۆسەی قیرتاوکردن دەستی پێکردوە و بڕیارە لە قۆناغی یەکەمدا ١٠ کیلۆمەتر قیرتاو بکرێت و دوای تەواوبوونی بڕین و پڕکردنەوەش، قۆناغی دووەمی قیرتاوکردنەکەش دەست پێ دەکات.
PUKMEDIA