قوباد تاڵه‌بانی له‌گه‌ڵ وه‌زیری ده‌ره‌وه‌ی توركیا كۆبووه‌وه‌

PUKMEDIA

قوباد تاڵەبانی و هاكان فیدان

قوباد تاڵه‌بانی، جێگری سه‌رۆك وه‌زیرانی هه‌رێم، پێشوازیكرد له‌ هاكان فیدان وه‌زیری ده‌ره‌وه‌ی توركیا و له‌ كۆبوونه‌وه‌ی نێوانیاندا په‌یوه‌ندییه‌كانی نێوان هه‌رێم و توركیا و هه‌روه‌ها په‌یوه‌ندییه‌كانی نێوان هه‌رێم و به‌غدا تاوتوێ كران.

له‌ ته‌وه‌رێكی كۆبوونه‌وه‌كه‌ كه‌ رۆژی پێنج شه‌مه‌ ٢٤ی ئابی ٢٠٢٣ له‌ هه‌ولێر به‌ڕ‌ێوه‌چوو و تیایدا هه‌ر یه‌كه‌ له‌ دابان شه‌ده‌ڵه‌ جێگری به‌رپرسی فه‌رمانگه‌ی په‌یوه‌ندییه‌كانی ده‌ره‌وه‌ی هه‌رێم و ئه‌حمه‌د موفتی بریكاری وه‌زیری سامانه‌ سروشتییه‌كان ئاماده‌ی بوون، گفتوگۆ كرا له‌باره‌ی په‌یوه‌ندییه‌كانی نێوان هه‌رێم و توركیا و چاره‌سه‌ر كردنی گرفته‌كان له‌نێویشیاندا پرسی فڕ‌ۆكه‌خانه‌ی سلێمانی، هه‌ردوولاش هاوڕ‌ابوون له‌سه‌ر گرنگی پته‌وكردنی په‌یوه‌ندییه‌كان له‌ بواره‌ جیاوازه‌كان و به‌ تایبه‌تیش له‌ بواری بازرگانیدا.

له‌ به‌شێكی دیكه‌ی كۆبوونه‌وه‌كه‌دا تاوتوێی كێشه‌كانی نێوان هه‌رێم و به‌غدا كرا. هه‌ردوولا جه‌ختیان كرده‌وه‌ له‌سه‌ر پێویستیی چاره‌سه‌ركردنی ناكۆكییه‌كان له‌ڕ‌ێگه‌ی گفتوگۆ و دانووستانه‌وه‌. 

له‌م چوارچێوه‌یه‌دا قوباد تاڵه‌بانی ئاماژه‌ی به‌وه‌دا سه‌رباری په‌سندكردنی یاسای بودجه‌، كێشه‌ی ناردنی به‌شه‌ بودجه‌ی هه‌رێم هێشتا به‌ ته‌واوی چاره‌سه‌ر نه‌كراوه‌. 

وتیشی: په‌رته‌وازه‌یی و نه‌بوونی یه‌كڕ‌یزی له‌نێوان لایه‌نه‌ كوردستانییه‌كان كاریگه‌ری هه‌بووه‌ له‌سه‌ر چاره‌سه‌ر نه‌كردنی كێشه‌كانی نێوان هه‌رێم و به‌غدا و به‌تایبه‌تیش له‌ پرسی بودجه‌دا.

هه‌ر له‌ كۆبوونه‌وه‌كه‌دا باسی چۆنییه‌تی به‌ره‌نگاربوونه‌وه‌ی دیارده‌ی بڵاوبوونه‌وه‌ی ماده‌ی هۆشبه‌ر كراو هه‌ردوولا به‌ پێویستیان زانی هه‌ماهه‌نگی و هاوكاری زیاتر هه‌بێت له‌نێوان لایه‌نه‌ په‌یوه‌ندیداره‌كانی هه‌ردوولا بۆ بنه‌بڕ‌كردنی ئه‌و دیارده‌یه‌.

فۆتۆ.. ئه‌ژی عومه‌ر

  PUKMEDIA