چاپێكی نوێی نۆڤلێتی " الأم والأبن"ـی خاتوو گەلاوێژ بەزمانی عەرەبی بڵاودەکرێتەوە

PUKMEDIA

نۆفلێتی" الأم والأبن"

لە ساڵیادی بەشی عەرەبی وێب سایتی خاتوو گەلاوێژ galawzh.com، چاپێكی نوێی نۆفلێتی " الأم والأبن"ـی خاتوو گەلاوێژ بەزمانی عەرەبی بڵاودەبێتەوە.

ئەم نۆفلێتە خاتوو گەلاوێژ نووسیویەتی بەزمانی عەرەبی، پێشكەشی كردوە بەدایكی شیرین و خۆشەویستی و  باسی لەوەكردوە زۆرێك لەشێوەی فیداكاری ودڵسۆزییەكانی دایكی لە چیرۆكەكەدا پێوە دیارە.

ئەم نۆفلێتەی خاتوو گەلاوێژ سەرەتا بەزمانی كوردی نووسیویەتی و هەر خۆشی كردویەتی بەزمانی عەرەبی و وەك خۆشی باسی دەكات شاعیری ناسراو و گەورەی عیراق بەڕەچەڵەك كورد، بڵند حەیدەری پێداچوونەوەی بۆكردووە و هانی زۆری داوە بۆ بەردوام بوون لەنووسین و هاوكات سوپاسی رەخنەگرو ئەكادیمی ناسراو دكتۆر سەلاح ئەنباری دەكات كە بە كارەكەدا چۆتەوەو هەروەها سوپاسی تایبەتی مامۆستا عەباس بەدری كردوە بەوەی كەهاوكاربووە لە پرۆسەی هەڵەبڕی.

مامۆستا عەباس بەدری لە پێناسەی ئەم بەرهەمەدا نووسیویەتی: "دایك و كوڕ چیرۆكی بەشێكە لە مێژووی سیاسی گەلی كورد...لەبەرئەوەی نووسەرەكەی كەهاوسەری سەركردەی سیاسی و رۆمانووسی مەزنی كورد خوالێخۆشبوو مامۆستا ئیبراهیم ئەحمەد بووە، لە تەواوی سەردەمە سیاسیە جیاوازەكانی مامۆستای خوالێخۆشبوو ژیاوەو رازگرو نهێنی پارێزی و هاوڕێی هەمیشەیی بووەو تا دواساتەكانی ژیانی. هەرلەبەر ئەوەیە یادەوەرییەكان لێوان لێوە لەو رووداوانەی ژیانی ئەو پیاوە مەزنە بە هەموو مەترسیەكانیەوە تا هەوڵی تیرۆركردنی لەلایەن دەربەگەكانەوە، ئەو دەمەی داكۆكی لە مافی جوتیاران دەكرد. وەك پارێزەرێك كە ناسرابوو بە (پارێزەری جوتیاران)، یادەوری ئەم خاتوونە نووسەرە رووداوە سیاسیەكانی سلێمانی و كەركوك و موسڵ و بەغدادی تیایە، لە زیندانێكەوە بۆ زیندانێكی ترو ...هتد، هەموو ئەم رووداوانەش لە ڕوانینێكی  بەرزی ئەدەبی كۆكراوەتەوە ".

هەروەها چاوەڕوان دەكرێت لە داهاتوویەكی نزیكدا، بە هاوكاری تەلەفزیۆنی گەلی كوردستان مێزگردێك دەربارەی ئەم نۆڤڵێتە بەڕیوە بچێت.
PUKMEDIA