‎سەعدی ئەحمەد پیرە: ئەركی هەموانە كۆنگرەی یەكێتی سەربخەین

دەرباز ستار

سەعدی ئەحمەد پیرە و شێخ میقداد شێخ بەهادین

رۆژی 10-9-2023، سەعدی ئەحمەد پیرە ئەندامی مەكتەبی سیاسی یەكێتی نیشتمانی كوردستان لە قەزای كەلار سەردانی مەڵبەندی گەرمیانی كرد و  لەلایەن  شێخ میقداد شێخ بەهادین لێپرسراوی مەڵبەند و كادیرانی سنوورەكەوە پێشوازیكرا.

سەعدی ئەحمەد پیرە  سەبارەت بە دۆخی سیاسی عیراق و هەرێمی كوردستان بەرچاوڕونی بەهەڤاڵان دا بەتایبەتیش كێشە هەڵواسراوەكانی نێوان هەرێمی كوردستان و حكومەتی ناوەندی سەبارەت بەو بڕگە دەستورییانەی كە ماف و داخوازییەكانی كۆمەڵانی خەڵكی كوردستانی تێدا جێگیركراوە، رایگەیاند: "هەوڵەكانی فراكسیۆنی یەكێتی لە ئەنجومەنی نوێنەرانی عیراق  بە ئاڕاستەی چارەسەرە كۆششەكانی بافڵ تاڵەبانی سەرۆكی یەكێتیی نیشتمانیی كوردستان  و مەكتەبی سیاسی یەكێتی خراوەتە گەڕ بۆ دۆزینەوەی رێگەچارەی یاسایی و دەستوری".
 
هەڤاڵ سەعدی ئەحمەد پیرە راشیگەیاند: "نابێت و  ناكرێت حكومەتی عیراق وەك دوژمن سەیر بكرێت لەكاتێكدا كورد و لایەنە كوردستانییەكان وەزیر و پشكیان لە حكومەتەكەیدا هەیە، بۆیە دەبێت دوواجار بگەنە چارەسەر لەگەڵ بەغدا و بگەنە ئەوەی بۆچی یاسای بوجە وەكو خۆی جێبەجێ نەكراوە".

‎دواتر رایگەیاند: "سەرۆكایەتییەكان لە بەغدا و لایەنە سیاسییەكان لە هەرێمی كوردستان هەوڵی هێمنكردنەوەی بارودۆخی كەركوك و سنووردانان بۆ ئاژاوەكانی ناو كەركوك بدۆزنەوە تاوانبارانی ئەو جنایەتانەی كە لە كەركوك كراوە و ئەوانەشی كە لە پشتییەوەن سرابدرێن".  

‎سەبارەت بە پرسی پێنجەمین كۆنگرەی یەكێتی، سەعدی ئەحمەد پیرە  دەڵێت: "هەنگاوێكی بوێرانەیە، پێویستە هەموو لایەكمان هەوڵ بدەین، بە یەكگرتوویی بچینە كۆنگرە و بەیەكگرتوویی دەربچین".  

‎لە كۆتایی دیدارەكەدا شێخ میقداد شێخ بەهادین لێپرسراوی مەڵبەند سوپاسی سەردان و بەسەركردنەوەكەی هەڤاڵ سەعدی ئەحمەد پیرە-ی كرد و ئاماژەی بەوەكرد كە ئەم جۆرە سەردان و بەسەركردنەوانەیان یارمەتی دەر دەبێت بۆ ئاڵوگۆڕی بیروڕا و بەرچاو روونی كادیرانی و ئەندامانی یەكێتیی نیشتمانیی كوردستان سەبارەت بە دواین پێشهات و گۆڕانكارییەكانی گۆڕەپانی سیاسی و عیراق و ناوچەكە و جیهان بەگشتی، هۆیەكیشە بۆ زیاتر برەودان بەكاروبارەكانی مەڵبەندەكەمان و دەوڵەمەندكردنی ئەو بەرنامەو كارنامەیەی كە ئێمە وەك یەكێتیی نیشتمانیی كوردستان دامانڕشتووە بۆ خزمەتكردنی خەڵكی ناوچەكە.

PUKMEDIA