قوباد تاڵەبانی و باڵیۆزی ئەمریکا: کێشەکانی هەرێم و بەغدا چارەسەر بکرێن

PUKMEDIA

قوباد تاڵەبانی و باڵیۆزی ئەمریکا لە عیراق

قوباد تاڵەبانی جێگری سەرۆک وەزیران پێشوازیکرد لە ئەلینا رۆمانۆڤسکی باڵیۆزی ئەمریکا لە عیراق و لە کۆبوونەوەی نێوانیاندا گفتوگۆکرا لەسەر کێشەکانی نێوان هەرێم و بەغدا بە تایبەتیش لەسەر پرسی بودجە و موچەی فەرمانبەران.

لە تەوەرێکی کۆبوونەوەکەدا کە رۆژی دووشەمە، ١١ی ئەیلولی ٢٠٢٣ لە هەولێر بەڕێوەچوو و تیایدا مارک سترۆ کونسوڵی گشتیی ئەمریکا لە هەرێم ئامادەی بوو، هەردوولا هاوڕابوون کە پێویستە بە خێرایی کێشەکانی ناوخۆی هەرێم چارەسەر بکرێن، بۆ ئەوەی بە یەکگرتوویی و یەکدەنگییەوە هەوڵی چارەسەرکردنی هەموو کێشەکانی نێوان هەرێم و بەغدا بدرێت، بە تایبەتیش کێشەی بودجە و موچەی فەرمانبەرانی کوردستان.

لەم چوارچێوەیەدا قوباد تاڵەبانی جەختی کردەوە هەرێمی کوردستان و کورد بە گشتی رووبەڕووی هەڕەشە و مەترسی جدی بووەتەوە، ئەگەر بە خێرایی نەتوانین بەسەر کێشە ناوخۆییەکاندا زاڵ بین، قەیرانەکان قوڵتر دەبنەوە، هۆشداریشیدا تا دەرفەتی زیاتر لە دەست دەدەین، چارەسەرکردنی کێشە و قەیرانەکانیش قورستر و ئاڵۆزتر دەبن.

جێگری سەرۆک وەزیران راشیگەیاند: "ئامادەیە لەپێناو چارەسەرکردنی کێشەی بودجە و موچەی هاووڵاتییان هەرچی هەنگاو و رێوشوێنی پێویستە بیگرێتەبەر".

PUKMEDIA