تۆماری كاروانی خەباتی ژنە پێشمەرگەكان بڵاوكرایەوە

PUKMEDIA

كتێبی كاروانی خەباتی ژنە پێشمەرگەكان

بەسەرپەرشتی خانمی یەكەمی عیراق رێوڕەسمی ناساندن و بڵاوكردنەوەی كتێبی (كاروانی خەباتی ژنە پێشمەرگەكان) لە هۆڵی خاك لەشاری سلێمانی بەڕێوەچوو.

بۆ رێزگرتن لەخزمەتەكانیان لەقۆناغی شاخ و پێشمەرگایەتیدا، لەسەر ئەركی خاتوو شاناز ئیبراهیم ئەحمەد خانمی یەكەمی عیراق، كتێبی كاروانی خەباتی ژنەپێشمەرگەكان لەچاپدرا.

لە وتەیەكدا، خاتوو شاناز خانمی یەكەمی عیراق، ستایشی قارەمانێتی ژنانی پێشمەرگەی كرد لەسەردەمی خەباتی شاخ و تێكۆشان و كوردایەتیدا، كەجگەلە بەڕێوەبردنی ئەركی خێزان، بەردەوام بوون لەخەبات و كۆڵنەدان و بەرگری لەخاكی پیرۆزی كوردستان و پشتیوانی هاوسەر و براكانیان بوون.

كتێبەكە لەلایەن نەسرین كوردە ئامادەكراوە كە سەرگوزشتەی ژیان و وێنەی ئەو ژنە تێكۆشەرانەی لەخۆگرتووە كە بە لەخۆبردوویی و بەخشین و پشودرێژییەوە بەرگەی سەركوتكردن و ستەمی رژێمی لەناوچویان گرت و سەروەرییان بۆ گەل و نیشتمان تۆماركرد.

هەر لەرێوڕەسمەكەی ئەمڕۆدا و سەرباری ئاماژەدان بەدەیان چیرۆك و داستانی پڕ سەروەری و نەبەردی ژنانی پێشمەرگە، خەڵاتی خاتوو شانازیان پێشكەش كرا.

PUKMEDIA