ئەنجومەنی نوێنەران خوێندنەوەی سێهەم بۆ بەپارێزگابوونی هەڵەبجە دەكات

PUKMEDIA

مۆنۆمێنتی هەڵەبجە، ئەنجومەنی نوێنەران

هەوڵەكانی یەكێتی بۆ بەڕ‌ەسمی ناساندنی بەپارێزگابوونی هەڵەبجە گەیشتوونەتە كۆتایی و لەوچوارچێوەیەشدا بڕ‌یارە ئەمڕۆ 14-9-2023، ئەنجومەنی نوێنەران خوێندنەوەی سێهەم بۆ پڕۆژە یاساكە بكات، ئەندامێكی فراكسیۆنی یەكێتیش لە ئەنجومەنی نوێنەرانی عیراق دەڵێت، "پێشتریش لە سەر داوای فراكسیۆنەكەمان بەپارێزگابوونی هەڵەبجە خراوەتە دانیشتنی پەرلەمانەوە و هەوڵی پەسەندكردنی پڕۆژەكە لە بەرژەوەندی هەڵەبجەییەكان دەدەین".

د.بڕیار رەشید ئەندامی ئەنجومەنی نوێنەرانی عیراق لە فراكسیۆنی یەكێتیی نیشتمانیی كوردستان بە PUKMEDIA ی راگەیاند: "ئەمڕۆ خوێندنەوەی سێهەم بۆ پڕۆژەیاسای بەپارێزگابوونی هەڵەبجە دەكرێت و كۆتایی بەپڕۆژەكە دێت".


هەر لەو بارەیەوە پێشتر چرۆ حەمەشەریف ئەندامی ئەنجومەنی نوێنەرانی عیراق لە فراكسیۆنی یەكێتیی نیشتمانیی كوردستان بە PUKMEDIA ی راگەیاندبوو: "پێشتر وەزارەتی پلاندانانی عیراق سنووری جوگرافیای پارێزگای هەڵەبجەی دیاریكردبوو، وەزارەتی ناوخۆی حكومەتی هەرێمی كوردستانیش پەسەندی كردووە".

"پێشتر وەك ئەندامی فراكسیۆنی یەكێتی لە ئەنجومەنی نوێنەرانی عیراق داوام لە سەرۆكی پەرلەمان كردبوو كە خوێندنەوەی سێهەم بۆ بەپارێزگابوونی هەڵەبجە بكرێت و هەڵەبجە ببێتە 19ـەمین پارێزگای عیراق، لەوچوارچێوەیەشدا سەرۆكی پەرلەمان لیژنەیەكی بۆ ئەوپرسە راسپارد كە بەدەم داواكەمانەوە بێن و خوێندنەوەی سێهەمی پڕۆژەكە بخرێتە دانیشتنی پەرلەمانەوە"، ئەندامەكەی ئەنجومەنی نوێنەران وادەڵێت.

پێشتر لەكاتی پێكهێنانی حكومەتی نوێی عیراق دا، بافڵ جەلال تاڵەبانی سەرۆكی یەكێتیی نیشتمانیی كوردستان یەكێك لەو پڕ‌ۆژانەی پێشكەشی كابینەكەی سودانی كرد پرسی بەپارێزگابوونی هەڵەبجە بوو، لەوچوارچێوەیەشدا ئەندامانی فراكسیۆنی یەكێتی هەوڵەكانیان بۆ بەپارێزگابوونی هەڵەبجە چڕ‌كردەوە، بەپارێزگابوونی هەڵەبجەیان گەیاندە قۆناغی كۆتایی و بڕ‌یارە رۆژی پێنج شەممە، ئەنجومەنی نوێنەران خوێندنەوەی سێهەم بۆ بەپارێزگابوونی هەڵەبجە بكات.

PUKMEDIA