شازادە بەسمە: مام جەلال كەسایەتییەكی كاریگەری سەر گۆڕەپانی سیاسی بوو

PUKMEDIA

خاتوو شاناز ئیبراهیم ئەحمەد و شازادە بەسمە

رۆژی 16-9-2023، خاتوو شاناز ئیبراهیم ئەحمەد خانمی یەكەمی عیراق پێشوازی لە شازادە بەسمە كچی گەلال خوشكی پادشا حسێن كوڕی گەلال پادشای پێشوتری ئوردن كرد، كە لەڕێی فڕۆكەخانەی نێودەوڵەتی سلێمانییەوە گەیشتە هەرێمی كوردستان.

هەر لەچوارچێوەی سەردانەكەیدا بۆ هەرێمی كوردستان شازادە بەسمە، مەزاری رابەری كۆچكردوو سەرۆك مام جەلال تاڵەبانی بەسەركردەوە و چەپكەگوڵی رێز و وەفای لەسەر گڵكۆی دانا، دواتریش لەپەڕاوی یادەوەرییەكانی مەزارەكەدا پەیامی خۆی نوسی و سەرۆك مام جەلالی بەهاوڕێیەكی بەوەفا و كەسایەتییەكی كاریگەری سەر گۆڕەپانی سیاسی و خۆشەویست بەلای هەمووانەوە وەسفكرد.

وێستگەیەكی تری سەردانەكەی شازادەی ئوردن هاوڕێ لەگەڵ خانمی یەكەمی عیراق،  بەئامادەبوونی ئاوات محەمەد قایمقامی سلێمانی، مۆزەخانەی نیشتمانی ئەمنەسورەكە بوو، كە لەگەشتێكدا بەنێو مۆزەخانەی پێشمەرگە و ئەنفال و بەشەكانی مۆزەخانەكەدا بەخەمەوە لەو نەهامەتیانەی دەڕوانی كەبەسەر رۆڵەكانی گەلی كورد هات لەسەردەمانی پێشودا بەدەست زوڵم و ستەمی رژێمی لەناوچوو لەسەركوت كردن و رەشبگیری تا دەگاتە شاڵاوەكانی ئەنفال و گۆڕە بەكۆمەڵەكان و كیمیاباران و قوربانیانی شەڕی تاقمی تیرۆریستی داعش.

ئەمەو بڕیارە سەردانەكەی وەفدی ئوردنی لەشاری سلێمانی ماوەی دوو رۆژ بخایەنێت و چەندین سەردان و بەسەركردنەوە لەخۆ بگرێت.

PUKMEDIA