فراکسیۆنە کوردستانییەکان: دواخستنی بەپارێزگابوونی هەڵەبجە قبوڵناکەین

PUKMEDIA

فراکسیۆنە کوردستانییەکان

فراکسیۆنە کوردستانییەکان جگە لە نەوەی نوێ لە دژی دواخستنی خوێندنەوەی سێیەم بۆ بەپارێزگابوونی هەڵەبجە کۆنگرەیەکی رۆژنامەوانییان ئەنجامداو داوایان کرد، بە زوتریین کات خوێندنەوەی سێیەم بۆ پرۆژە یاسای بە پارێزگابوونی هەڵەبجە بکرێت، هەروەها راشیانگەیاند: "قبوڵی ناکەین لەوە زیاتر بەپارێزگابوونی هەڵەبجە دوابخرێت".

لە کۆنگرە رۆژنامەوانییەکەدا هەرێم کەمال ئاغا بە ناوی سەرجەم فراکسیۆنە کوردستانییەکانەوە رایگەیاند: "دواخستنی خوێندنەوەی سێیەم بۆ پرۆژە یاسای بە پارێزگابوونی هەڵەبجە بەبیانووی جیاجیا، لای فراکسیۆنە کوردستانییەکان چاوەڕوان نەکراوبوو، لە کاتێکدا بۆ ئەو پرسە فراکسیۆنە کوردستانییەکان لەگەڵ سەرجەم فراکسیۆنەکانی دیکەی پەرلەمان گفتوگۆیان کردوەو رەزامەندبوون لەسەر ئەو پرسە".

"داوا دەکەین پرسی هەڵەبجە نەخرێتە پاڵ هیچ بابەتێکی دیکە و بەپارێزگابوونی هەڵەبجە بچوکترین دیارییە بۆ ئەو قوربانییە گەورەیەی کە هەڵەبجەییەکان لە مێژوودا بۆ ئازادی و دیموکراسی عیراق داویانە، ئەمەش لە کاتێکدایە هیچ رێگرییەکی دەستوری بۆ بەپارێزگابوونی هەڵەبجە نییە و هەڵەبجە بەشێکی گەورەیە لە پرۆسەی دیموکراسی لە عیراقدا"، هەرێم کەمال ئاغا وای وت.

دەشڵێت: "وەک فراکسیۆنە کوردستانییەکان داوا لە سەرجەم فراکسیۆنەکانی پەرلەمانی عیراق دەکەین، هاوڕامانبن و بەهەموو لایەک هەوڵ بدەین بەڕەسمی لەلایەن پەرلەمانی عیراقەوە هەڵەبجە وەک 19 هەمین پارێزگای عیراق بناسێنین".

PUKMEDIA