قوباد تاڵەبانی: جگە لە دژە تیرۆر هیچ هێزێكی دیكە لە فڕۆكەخانەی عەربەت نەبووە

نووسینگەی جێگری سەرۆكوەزیران

قوباد تاڵەبانی جێگری سەرۆكوەزیران و تۆركیڵد بیگ نوێنەری یەكێتی ئەوروپا

قوباد تاڵەبانی جێگری سەرۆكوەزیران پێشوازیكرد لە تۆركیڵد بیگ نوێنەری یەكێتی ئەوروپا لە هەرێمی كوردستان و لە كۆبوونەوەی نێوانیاندا رووداوی هێرشكردنەسەر هێزەكانی دژەتیرۆر لە فڕۆكەخانەی عەربەت تاوتوێ كرا.

لە كۆبوونەوەكەدا كە رۆژی 20-9-2023، لە هەولێر بەڕێوەچوو، نوێنەری یەكێتی ئەوروپا بە توندی ئیدانەی بۆردومانكردنی فڕۆكەخانەی عەربەتی كرد و هیوای خواست جارێكی دیكە رووداوی لەو شێوەیە دووبارە نەبێتەوە.

جێگری سەرۆك وەزیران لەمبارەیەوە رایگەیاند: "ئەم رووداوە پێشهاتێكی مەترسیدارە و تیایدا هێزێكی فەرمی عیراقی و كوردستانی كراوەتە ئامانج كە هێزی دژەتیرۆری كوردستانە و بۆ هەموولایەكیش ئاشكرایە كە ئەو هێزە لە سەرەتای دامەزراندنییەوە بە درێژایی دوو دەیە هاوكار و هاوپەیمانی سەرەكی هێزەكانی هاوپەیمانان بووە لە شەڕی دژەتیرۆردا".

قوباد تاڵەبانی بە توندی پاساوی لایەنی هێرشبەری رەتكردەوە و رایگەیاند: "شەهیدەكان و بریندارەكانی رووداوەكە هەموویان پێشمەرگەی قارەمانی كوردستان و ئەندامی هێزەكانی دژەتیرۆر بوون و بە هیچ شێوەیەك جگە لە هێزی دژە تیرۆر هیچ هێزێكی دیكە لە فڕۆكەخانە نەبووە".

جێگری سەرۆك وەزیران داواشیكرد: "حكومەتی عیراق و هاوپەیمانان و یەكێتی ئەوروپا بۆ پاراستنی سەروەری عیراق و رێگریكردن لە دووبارەبوونەوەی ئەم جۆرە پێشێلكارییانە هەنگاوی كردەیی بنێن و سنوورێك بۆ ئەو هێرشە سەربازییانە دابنێن كە دەكرێنەسەر خاكی هەرێم و عیراق".

PUKMEDIA