سەرۆك بافڵ: دروستكردنی بەربەست بۆ بەپارێزگابوونی هەڵەبجە خزمەتی هیچ لایەنێك ناكات

نووسینگەی سەرۆكی یەكێتی

بافڵ جەلال تاڵەبانی سەرۆكی یەكێتی و حەیدەر عەبادی سەرۆكی ھاوپەیمانیی نەسر

بافڵ جەلال تاڵەبانی سەرۆكی یەكێتیی نیشتمانیی كوردستان،  لە بەغدا چاویكەوت بە حەیدەر عەبادی، سەرۆكی ھاوپەیمانیی نەسر.

‌‎لەدیدارێكدا گەشەپێدانی پەیوەندیی دۆستانەی نێوان یەكێتی، هاوپەیمانیی نەسر و لایەنە عیراقییەكان جەختیلێكرایەوە و جەخت لە فراوانكردنی هەماهەنگییەكان كرایەوە لەپێناو بەدیهێنانی بەرژەوەندییە باڵاكان و پاراستنی سەقامگیریی هەرێم و عیراق.

‌‎ لەدرێژەی دیدارەكەدا بە نیگەرانییەوە باس لە هێرشەكەی سەر فڕۆكەخانەی عەربەت كرا و لەو رووەوە سەرۆك بافڵ رایگەیاند: "رێگریكردن لە دەستدرێژییەكان و پاراستنی سەروەرییەكانی وڵات پەیوەستە بە كۆدەنگیی نیشتمانییەوە، بۆیە پێویستە هەمووان هەوڵ بۆ رێگریكردن لەو هێرشانە بدەن و نەهێڵین چیتر سەقامگیریی خاكەكەمان روبەڕوی مەترسی ببێتەوە".

‌‎پرسی بەپارێزگابوونی هەڵەبجە تەوەرێكیتری دیدارەكە بوو و لەوبارەیەوە سەرۆك بافڵ وتی: "دروستكردنی بەربەست لەبەردەم بەپارێزگابوونی هەڵەبجە خزمەت بە هیچ لایەنێك ناكات، پێویستە هەموولایەك بە ئەركی ئەخلاقی و ویژدانی خۆی هەڵبستێت و هەوڵ بۆ ئاوەدانكردنەوە و قەرەبووكردنەوەی شارەكە بدەن".

PUKMEDIA