ستران عەبدوڵڵا: کۆنگرەی یەکێتی کاریگەری لەسەر هەرێم و عیراق دەبێت

PUKMEDIA

ستران عەبدوڵڵا

ئەندامێکی مەکتەبی سیاسی باس لە بەرێوەچونی رێکارەکان و ئامادەکارییەکان بۆ پێنجەمین کۆنگرەی یەکێتی دەکات و دەڵێت: "کۆنگرەی یەکێتی کاریگەری لەسەر هەرێم و عیراق دەبێت و لە پێنجەمین کۆنگرەدا دەسەڵاتی زیاتر دەدرێت بە سەرۆک بافڵ".

ستران عەبدوڵڵا ئەندامی مەکتەبی سیاسی یەکێتیی نیشتمانیی کوردستان لە میانی بەشداری لە بەرنامەی پانۆرامای کەناڵی کوردسات رایگەیاند: "کۆنفرانسی مەڵبەند و مەکتەبەکانی یەکێتی زۆر بە دیموکراسییانە بەڕێوەچوو، کەئەمەش بەشێکە لە سەرکەوتنی کۆنگرەی یەکێتی و لە پێنجەمین کۆنگرەدا دەسەڵاتی زیاتر دەدرێت بە سەرۆک بافڵ جەلال تاڵەبانی".

"بەهەوڵی سەرۆک بافڵ و سەرکردایەتی نوێی یەکێتی بۆ یەکەم جارە کۆنگرە لەکاتی خۆیدا بەڕێوەدەچێت و سەرۆکی یەکێتی بەربەستەکانی بەردەم بەڕێوەنەچونی پێنجەمین کۆنگرەی لابرد و دەبێت هەوڵ بدرێت هەموو و حزبە سیاسییەکانی هەرێم لەکاتی خۆیدا کۆنگرە ئەنجام بدەن و نوێگەری بکەن"، ستران عەبدوڵڵا وای وت.

دەشڵێت: "ئەم کۆنگرەیەی یەکێتی هەڤاڵانە و دیموکراسیانە و سەرکەوتوانە بەرێوەدەچێت و بۆ هەموو یەکێتی دەبێت و لەم کۆنگرەیەدا جەختدەکرێتەوە لەسەر کۆدەنگی لە بڕیاردان لەسەر کۆی پرسە گرنگەکان".

حزوری سەرۆک بافڵ لەبەغدا پەیوەندی بە ژیانی خەڵکەوە هەیە

ستران عەبدوڵڵا لەبارەی سەردانەکانی سەرۆک بافڵ_ەوە بۆ بەغدا دەڵێت: "حزوری یەکێتی لەبەغدا و بەتایبەت سەرۆک بافڵ جەلال تاڵەبانی سەرۆکی یەکێتی پەیوەندی بە ژیان و بژێوی خەڵکی کوردستانەوە هەیە، کەلەئێستادا چەقی بەرگریکردن لە مافەکانی خەڵکی کوردستان لەبەغدایە و دەبێت لەبەغداوە داوای مافەکانی کورد بکرێت".

"یەکێتی لەهەموو هەلومەرجێکدا دەرگای گفتوگۆی کراوەیە بۆ هەموو لایەنەکان، بۆ ئاشتی و پێکەویی هەموو هەوڵێک دەدات و لەدوای ئەم کۆنگرەیەش لەو هەوڵانە بەردەوام دەبێت، خەڵکی کوردستانیش وریا و بە ئاگان کەپێویستە سەرجەم لایەنەکانی هەرێم یەک دەنگ و یەکگرتوو بن، بەتایبەت بۆ چونە بەغدا و داکۆکی لەمافەکانی کورد"، ستران عەبدوڵڵا وای وت.

یەکێتی بە رۆحیەتێکی گەنجانە بەڕێوەدەچێت

ئەندامەکەی مەکتەبی سیاسی وتیشی: "پلانی پێنجەمین کۆنگرە نوێ کردنەوەی یەکێتی و هێنانە پێشەوەی گەنجان و ژنانە بۆ ناو ئۆرگانەکانی یەکێتی و ئەمەش وادەکات هەر حزبێکی سیاسی نوێ ببێتەوە، یەکێتی لەگەڵ ئەوەی حزبێکی مێژووییە، حزبێکیشە بۆ ئایندە و هەیکەلی نوێی یەکێتی جێگای گەنجان و تێکۆشەرانیشی تێدایە و وادەکات یەکێتی بە رۆحێکی گەنجانە بەڕێوەبچێت".

 
PUKMEDIA