ئاگادارییەك لە دامەزراوەی سەرۆك جەلال تاڵەبانی-یەوە

PUKMEDIA

لۆگۆی دامەزراوەی سەرۆک جەلال تاڵەبانی

دامەزراوەی سەرۆك جەلال تاڵەبانی ئاگاداری ئەوكەسانە دەكاتەوە كە كارتی بانگهێشتنامەیان بۆ بەشداریكردن لە مەڕاسیمی شەش ساڵەی كۆچی دوایی سەرۆك مام جەلال لە بەغدا و دیداری نەجەف پێگەیشتووە، تكایە لەماوەی سێ رۆژی داهاتوودا پەیوەندی بەو ژمارە تەلەفۆنانەوە بكەن كە لەسەر كارتی بانگهێشتنامەكە هەن، بەمەبەستی تەرخانكردنی تكتی فڕۆكە و شوێنی مانەوە لە نەجەف.

هەر لەوبارەیەوە پێشتر باڵیۆز د. محەمەد سابیر سەرۆكی دامەزراوەی سەرۆك جەلال تاڵەبانی بە سایتی رەسمی یەكێتیی نیشتمانیی كوردستان PUKMEDIA ی راگەیاندبوو: "ئامادەكارییەكانمان بۆ ساڵیادی كۆچی دوایی سەرۆك مام جەلال بەكۆتا گەیشتووە و یادەكە لە سلێمانی و بەغدا و نەجەف دەبێت، ئەمە جگە لەوەی لە رۆژی 10ـی ئۆكتۆبەر، كورتە فیلمێك لەبارەی ژیانی سەرۆك مام جەلال لە سلێمانی نمایش دەكرێت".

"رۆژی 3ـی ئۆكتۆبەر كە هاوكاتە لەگەڵ رۆژی كۆچی دوایی سەرۆك مام جەلال، سەرەتای مەڕاسیمەكە بە دانانی تاجەگوڵینە لەسەر مەزاری مام لە دەباشان دەستپێدەكات كە لەلایەن سكرتارییەتی سەرۆك مام جەلالەوە مەراسیمەكە بەڕێوەدەچێت، پاشانیش هەمان رۆژ  سەعات 4ـی پاشنیوەڕۆ، مەراسیمێكی شایستە لە بەغدا لەژێر چاودێری سەرۆك كۆماری عیراق كە سەركردە عیراقییەكان بەشدار دەبن و وتاریان دەبێت بەڕێوەدەچێت"، سەرۆكی دامەزراوەی سەرۆك جەلال تاڵەبانی وادەڵێت.

وتیشی: "هەر لە چوارچێوەی ساڵیادی كۆچی دوایی سەرۆك مام جەلال دا، دامەزراوەی سەرۆك جەلال تاڵەبانی و دامەزراوەی بەحر لعلوم، سەعات 11ـی پێشنیوەڕۆی رۆژی 4ـی ئۆكتۆبەر لە نەجەف دیدارێك كە چەند پانێڵیك لەخۆدەگرێت سازدەكەن، تێیدا چەند توێژینەوەیەك لەبارەی سەرۆك مام جەلال دەخرێنەڕوو".

دەقی ئاگادارییەکەی دامەزراوەی سەرۆك جەلال تاڵەبانی

PUKMEDIA