ئەمریكا نیگەرانە لە پاشەكشەی بەردەوامی ئازادی راگەیاندن لە هەرێم

پەڕەی رەسمی فەیسبوکی كونسوڵخانەی ئەمریكا لە هەولێر

لۆگۆی كونسوڵخانەی ئەمریكا لە هەولێر

مارك سترۆ كونسوڵی گشتیی كونسوڵخانەی ئەمریكا لە هەرێمی کوردستان کە خۆی پێشتر رۆژنامەنووس بووە، نیگەرانە لە پاشەكشەی ئازادی راگەیاندن لە هەرێم و دەڵێت: "بەردەوامین لە نیگەرانیەكانمان دەربارەی پاشەكشەی ئەم دواییانەی ئازادیی راگەیاندن و مافی بەدەستهێنانی زانیاری لە هەرێم".

ئەم نیگەرانییە لە میانی كۆبوونەوەی مارك سترۆ كونسوڵی گشتی ئەمریكا لە هەرێم و ژمارەیەك رۆژنامەنووسی سەربەخۆی ناوەندی راگەیاندنی هەرێمدا بووە كە لە پەڕەی رەسمی كونسوڵخانەی ئەمریكا لە هەولێر لە تۆڕی كۆمەڵایەتی فەیسبووك بڵاو كراوەتەوە و دەستخۆشی دەكات لە رۆژنامەوانان لە بەرامبەر هەوڵە بەردەوامەكانیان بۆ رووماڵكردنی بێلایەنانەی هەواڵە سیاسی و ئابوری و كۆمەڵایەتیەكانی هەرێم.

مارك سترۆ دەڵێت: "بەردەوامین لە نیگەرانیەكانمان دەربارەی پاشەكشەی ئەم دواییانەی ئازادیی راگەیاندن، پاشەكشە لە نموونەی دەستبەسەركردنی هەڕەمەكیانە و پشكنینی نایاسایی ئامێری ئەلیكترۆنی و كەموكوڕیی لە جێبەجێكردنی یاسای كاری راگەیاندن و یاسای مافی بەدەستهێنانی زانیاریی هەرێمی كوردستان".

مارك سترۆ پێشترکە رۆژنامەنووس بووە، هەروەها وەک كونسوڵی گشتی ئەمریكا لە كەراچی، پاكستان كاری كردووە، بە وەكالەت وەك یاریدەدەری سكرتێر و بەڕێوەبەری بەڕێوەبردنی میدیا نێودەوڵەتییەكانە لە مەكتەبی كاروباری گشتی جیهانی لە واشنتۆن، هەروەها وەك بەڕ‌ێوەبەری پەیوەندییە ستراتیژییەكان و یاریدەدەری سكرتێری رۆژنامەوانی لەستافی سكرتاریەتی جێبەجێكاردا خزمەتی كردووە، دواپۆستیشی وەك جێگری وتەبێژی ئەنجومەنی ئاسایشی نیشتمانیی (NSC) بووە.
PUKMEDIA