نزیكەی 250 ئەندامی كۆنگرە پێشنیارەكانیان بۆ پەیڕەو دەنێرن

PUKMEDIA

پێنجەمین كۆنگرەی یەكێتی

پێنجەمین كۆنگرەی یەكێتی بەردەوامە و كارەكانی لیژنەكان كۆتایی هاتووە، وتەبێژی كۆنگرەش دەڵێت: "ئەگەر ئەمڕۆ نەتوانرا دەنگ لەسەر تەواوی ماددەكانی پەیڕەوی ناوخۆ بدرێت و ئەندامانی ئەنجومەنی سەركردایەتی هەڵنەبژێردرێن، پێدەچێت كۆنگرە رۆژێك درێژ بكرێتەوە، هاوكات نزیكەی 250 ئەندامی كۆنگرە پێشنیارەكانیان بۆ پەیڕەو ناردووە".

تەلار لەتیف وتەبێژی پێنجەمین كۆنگرەی یەكێتی لە لێدوانێكیدا بۆ سایتی رەسمی یەكێتیی نیشتمانیی كوردستان PUKMEDIA رایگەیاند: "لەگەڵ ئەوەی كە كاری لیژنەكان كۆتایی پێهات و گفتوگۆ لەبارەی راپۆرتی لیژنەكانەوە كرا، بەڵام تا ئێستادا دەنگ لەسەر پەیڕەوی ناوخۆ نەدراوە، چونكە زۆرترین پێشنیار و راوبۆچوونی ئەندامانی كۆنگرە لەبارەی پەیڕەوی ناوخۆ بووە و هەوڵدراوە بۆ چوونی هەڤاڵان بە هەند وەربگیرێت".

"نزیكەی 250 ئەندامی كۆنگرە پێشنیارەكانیان ئاڕاستەی لیژنەی پەیڕەو كردووە، ئەمە جگە لەوەی پێشنیارێكی زۆریش لەبارەی هەرسێ ئەنجومەنەكە و مەڵبەند و مەكتەبەكان كراون" تەلار لەتیف وادەڵێت.

راشیگەیاند: "پاش دەنگدان لەسەر پەیڕەوی ناوخۆ ئەندامانی ئەنجومەنی سەركردایەتی هەڵدەبژێردرێن، بەڵام ئەگەر ئەمڕۆ نەتوانرا دەنگ لەسەر تەواوی ماددەكانی پەیڕەوی ناوخۆ بدرێت كە 65 ماددەیە و ئەندامانی ئەنجومەنی سەركردایەتی هەڵنەبژێردران، پێدەچێت كۆنگرە رۆژێك درێژ بكرێتەوە".


PUKMEDIA