ئەمریکا پیرۆزبایی لەسەرۆک بافڵ و سەرکردایەتی یەکێتی دەکات

PUKMEDIA

سەرۆک بافڵ و کونسوڵی گشتیی ئەمریکا

بافڵ جەلال تاڵەبانی، سەرۆکی یەکێتیی نیشتمانیی کوردستان لە سلێمانی پێشوازی لە دەیڤد بەرگر، هەڵسوڕێنەری کاروباری باڵیۆزخانەی ئەمریکا لە عیراق کرد.

لەدیدارەکەدا کە مارک سترۆ، کونسوڵی گشتیی ئەمریکا لە هەرێم ئامادەبوو، دەیڤید بەرگر پیرۆزبایی هەڵبژاردنەوەی بە سەرۆکی یەکێتی لە بافڵ جەلال تاڵەبانی، سەرکردایەتیی نوێ و سەرکەوتنی پێنجەمین کۆنگرەی حزبەکە کرد. دواتر دۆخی گشتیی وڵات و پەیوەندییەکانی نێوان هەولێر و بەغدا گفتوگۆی لەبارەوەکرا و جەخت لە چارەسەرکردنی کێشەکان کرایەوە بەشێوەیەک کە مافی خەڵک و سەقامگیریی ناوچەکە پارێزراوبێت.

لەدرێژەی دیدارەکەدا سەرۆک بافڵ ستایشی هەوڵە ئەرێنییەکانی ئەمریکای کرد بۆ چارەسەرکردنی کێشەکان و ئاماژەی بۆ ئەوەکرد، باشترین بژاردە بۆ تێپەڕاندنی بەربەستەکان و پاراستنی سەقامگیریی ناوچەکە، پابەندبوونە بە دەستوور و ئەو رێککەوتنانەی کراون، هەموو هەنگاوێکیش لەدەرەوەی ئەم ئیرادەیە، زیانگەیاندنە بە مافی خەڵک و بەرژەوەندییە گشتییەکان. وتیشی، هەوڵەکانمان بۆ ناردنی شایستە داراییەکانی هەرێم کاری لەپێشینەی ئێمەیە و نابێت ئەم پرسە تێکەڵی کێشە سیاسییەکان بکرێت.

PUKMEDIA