ئەنجومەنی سەرکردایەتی یەکەم کۆبونەوەی دوای کۆنگرە ئەنجامدەدات

PUKMEDIA

لۆگۆی یەکێتیی نیشتمانیی کوردستان

بڕیاره‌ سبه‌ینێ یه‌كشه‌ممه‌ 8-10-2023، یه‌كه‌م كۆبوونه‌وه‌ی ئه‌نجومه‌نی سه‌ركردایه‌تی نوێی یه‌كێتی به‌سه‌رپه‌رشتی بافڵ جه‌لال تاڵه‌بانی سه‌رۆكی یه‌كێتیی نیشتمانیی كوردستان ئه‌نجامبدرێت.

له‌و باره‌یه‌وه‌ ستران عه‌بدوڵڵا ئه‌ندامی سه‌ركردایه‌تی یه‌كێتی به‌ سایتی ره‌سمی یه‌كێتیی نیشتمانیی كوردستان PUKMEDIA ی راگه‌یاند: "سبه‌ینێ سه‌ركردایه‌تی نوێی یه‌كێتی به‌ سه‌رپه‌رشتی سەرۆک بافڵ جه‌لال تاڵه‌بانی یه‌كه‌م كۆبوونه‌وه‌ی خۆی له‌ سلێمانی ئه‌نجامده‌دات.

به‌پێی په‌یڕه‌وی ناوخۆی په‌سندكراوی پێنجه‌مین كۆنگره‌ی یه‌كێتیی نیشتمانیی كوردستان كه‌ له‌مادده‌ی 22 ، خاڵی 4 دا هاتووه‌ (دوای كۆنگره‌ سه‌رۆكی یه‌كێتیی نیشتمانیی كوردستان بانگهێشتی ئه‌نجومه‌نی سه‌ركردایه‌تی ده‌كات و سه‌رپه‌رشتی یه‌كه‌م كۆبوونه‌وه‌ ده‌كات)، به‌پێی هه‌مان مادده‌، خاڵی یه‌كه‌م، ئه‌نجومه‌نی سه‌ركردایه‌تی پێكدێت له‌ 61 هه‌ڤاڵ به‌سه‌رۆكی یه‌كێتییه‌وه‌.

رۆژی 27-9-2023 یه‌كێتیی نیشتمانیی كوردستان، پێنجه‌مین كۆنگره‌ی خۆی له‌سلێمانی ده‌ستپێكردوو ماوه‌ی 5 رۆژی خایاند، كه‌ تێیدا به‌كۆی ده‌نگ بافڵ جه‌لال تاڵه‌بانی وه‌ك سه‌رۆكی یه‌كێتی و 60 هه‌ڤاڵی وه‌ك ئه‌ندامانی سه‌ركردایه‌تی هه‌ڵبژاردو هه‌روه‌ها په‌یڕه‌وی نوێی ناوخۆی حزبیشی په‌سند كرد.

PUKMEDIA