کۆبوونەوەی ئەنجومەنی سەرکردایەتی یەکێتی کۆتاییهات

PUKMEDIA

ئەنجومەنی سەرکردایەتی یەکێتیی نیشتمانیی کوردستان

کۆبوونەوەی ئەنجومەنی سەرکردایەتی نوێی یەکێتیی نیشتمانیی کوردستان بە سەرپەرشتی سەرۆک بافڵ کۆتاییهات و بڕیارە سبەینێ جارێکی دیکە کۆببێتەوە.

رابیحە حەمەد ئەندامی سەرکردایەتی یەکێتیی نیشتمانیی کوردستان بە سایتی رەسمی یەکێتی PUKMEDIA ی راگەیاند: "دوای گفتوگۆیەکی هەڤاڵانە لەبارەی هەنگاوەکانی یەکێتی بۆ داهاتوو، کۆبوونەوەی ئەمڕۆی سەرکردایەتی هەڵگیرا و بڕیارە سبەینێ درێژە بە کۆبوونەوەکە بدرێت".

"لە کۆبوونەوەکەی ئەمڕۆی ئەنجومەنی سەرکردایەتی یەکێتیی نیشتمانیی کوردستاندا، باس لە هەنگاوەکانی یەکێتی بۆ دوای کۆنگرە لەناوخۆ و دەرەوەی هەرێم و کاری حزبی و رێکخراوەیی و سیاسیی کرا"، رابیحە حەمەد وادەڵێت.

کۆبوونەوەکەی ئەنجومەنی سەرکردایەتی یەکێتی لەکاتێکدایە کە رۆژی 27-9-2023، یەکێتیی نیشتمانیی کوردستان پێنجەمین کۆنگرەی خۆی ئەنجامدا و تێیدا بافڵ جەلال تاڵەبانی بە سەرۆکی یەکێتیی نیشتمانیی کوردستان و 60 ئەندامی سەرکردایەتی هەڵبژارد، کۆبوونەوەکەی ئەمڕۆش یەکەم کۆبوونەوەی دوای کۆنگرە بوو کە بەپێی پەیڕەوی ناوخۆی حزب پێویستە لە ماوەی 15 رۆژدا دوای کۆنگرە، ئەنجومەنی سەرکردایەتی یەکەم کۆبوونەوەی خۆی ببەستێت.
PUKMEDIA