دامەزراوەی سەرۆك جەلال تاڵەبانی بەشداری و ئامادەكاریی كۆنفڕانسێكی نێودەوڵەتی دەكات

دامەزراوەی سەرۆك جەلال تاڵەبانی

باڵیۆز د. محەمەد سابیر سەرۆكی دامەزراوەی سەرۆك جەلال تاڵەبانی

رۆژی 11-10-2023،  باڵیۆز د. محەمەد سابیر، سەرۆكی دامەزراوەی سەرۆك جەلال تاڵەبانی پێشوازی لە پ. ی. د. محەمەد حەسیب، سەرۆكی زانكۆی كۆیە و ئەنجومەنی زانكۆ كرد.

لەو دیدارەدا بڕیارەدرا رۆژی 28-4-2024، سێیەمین كۆنفڕانسی نێودەوڵەتی نەوت لەسەر پاشماوەكانی نەوت و گاز و كاریگەری لەسەر ژینگە، لە شاری كۆیە ببەسرێت و دامەزراوەی سەرۆك جەلال تاڵەبانی بە شێوەیەكی كارا بەشدار و ئەمادەكار دەبێت.

سەرۆكی دامەزراوەی سەرۆك جەلال تاڵەبانی لە كۆبوونەوەیەكی رۆژنامەوانیدا بە میدیاكانی وت: "ئەم كۆنفڕانسە لەبارەی ریسایكلكردن و كەمكردنەوەی پاشماوەكان و تەكنەلۆژیای گەڕاندنەوەی پاشماوە و چارەسەركردنیان و پاشماوەی چالاكییەكانی بیرهەڵكەندن و  بەرهەمێنانی غاز و پاڵاوتنی نەوت دەبێت".

سەرۆكی زانكۆی كۆیەش وتی: "سوپاسی دامەزراوەی سەرۆك جەلال تاڵەبانی دەكەین هاوكار و هاوبەشمانن لە چالاكییەكاندا و رۆڵی بەرچاو دەگێڕن"،  وتیشی: " سێیەمین كۆنفڕانسی نێودەوڵەتیی نەوت چەندین ئامانج لە خۆدەگرێت بۆ باشتركردنی پرۆسەی كۆنتڕۆڵكردن و چارەسەركردنی پاشماوەكان". 

لایەنە بەشدار و ئامادەكارەكانی بەستنی سێیەمین كۆنفڕانسی نێودەوڵەتیی نەوت دامەزراوەی سەرۆك جەلال تاڵەبانی، زانكۆی كۆیە، زانكۆی بەسرە، زانكۆی میزۆری بۆ زانست و تەكنەلۆجیا- رۆڵا ویلایەتە یەكگرتووەكانی ئەمریكایە.

لە بەشێكی دیكەی دیدارەكە باڵیۆز د. محەمەد سابیر بە گرنگییەوە باسی لە رۆڵی سەرۆك مام جەلال كرد لە دانانی بەردی بناغە و دروستكردنی زانكۆی كۆیە  كە ئەمڕۆ هاوكات بوو لەگەڵ یادی دانانی بەردی بناغەی زانكۆی كۆیە 20 ساڵ لەمەوبەر.



PUKMEDIA