سەرۆك بافڵ: یەكێتی پشتیوانی لە یەكخستنەوەی هێزی پێشمەرگە دەكات

نووسینگەی سەرۆكی یەكێتی

پێشوازی بافڵ جەلال تاڵەبانی سەرۆكی یەكێتی لە وەفدی وەزارەتی دەرەوەی ئەمریكا

بافڵ جەلال تاڵەبانی سەرۆكی یەكێتیی نیشتمانیی كوردستان، لە بارەگای مەكتەبی سیاسی لە هەولێر پێشوازیكرد لە وەفدێكی وەزارەتی دەرەوەی ئەمریكا بە سەرۆكایەتی ڤیكتۆریا تایلۆر، جێگری یاریدەدەری وەزیری دەرەوەی ئەمریكا.

‌‎لەدیدارێكدا گۆڕانكاریی و پێشهاتە سیاسی، ئابووری و ئەمنییەكانی هەرێم، عیراق و ناوچەكە تاوتوێكران و جەخت لە رەخساندنی زەمینەیەكی لەبار بۆ نەهێشتنی بەربەستەكانی بەردەم پرۆسەی سیاسی بەتایبەت لەنێوان هەولێر و بەغدا كرایەوە بەجۆرێك دەستوور و گفتوگۆ بناغەی پەیوەندییەكان بن.

‌‎هەر لە دیدارەكەدا سەرۆك بافڵ جەلال تاڵەبانی لەسەر كۆی هاوكێشەكان هەڵوەستەیكرد و ئاماژەی بە بەردەوامیی هەوڵە ئەرێنی و یاساییەكان كرد بۆ چارەسەكردنی كێشەكانی نێوان هەرێم و عیراق و رایگەیاند: "هەر پرسێك پەیوەست بێت بە ژیانی خەڵك و مووچەوە داوامانكردووە دووربخرێتەوە لە ناكۆكییە سیاسییەكان، بۆ ئەوەش چەندین میكانیزمی پێویست خراونەتەڕوو تاوەكو ئەم كێشەیە لە بنەڕەتەوە چارەسەربكەین و بە یاسا ماف و ژیانی خەڵكی هەرێم مسۆگەر بكەین".

‌‎سەبارەت بە پرسی رێكخستنەوەی هێزی پێشمەرگە، سەرۆك بافڵ وەفدی میوانی بەرچاوڕوونكرد و بەربەستەكانی بەردەم ئەم هەنگاوە نیشتمانییەی خستەڕوو، جەختیشیكردەوە كە ئیرادەیەكی بەهێز هەیە بۆ زاڵبوون بەسەر ئەم كێشەیەشدا تاوەكو بە هاوكاریی هاوپەیمانەكانمان هێزێكی نیشتمانی و تۆكمە بونیادبنێین، یەكێتیش پشتیوانیی تەواو لە سەرخستنی ئەم ئامانجە نیشتمانییە دەكات بە شێوەیەك یەكسانی و دادپەروەریی تێدا رەچاوبكرێت.

PUKMEDIA