هه‌رێم كه‌مال ئاغا: كێشه‌ی فڕۆكه‌خانه‌كانی سلێمانی سیاسییه‌

PUKMEDIA

هەرێم کەمال ئاغا

هه‌رێم كه‌مال ئاغا ئه‌ندامی لیژنه‌ی ئاسایش و به‌رگری له‌ئه‌نجومه‌نی نوێنه‌رانی عیراق له‌چاوپێكه‌وتنێكیدا له‌گه‌ڵ PUKMEDIA ئاماژه‌ بۆ ئه‌وه‌ده‌كات:" هێرشه‌كانی سه‌ر فڕۆكه‌خانه‌كانی سنووری پارێزگای سلێمانی سیاسییه‌و هیچ په‌یوه‌ندییه‌كی به‌بوونی كه‌سی بیانی سه‌ربازی و مه‌ده‌نییه‌وه‌ له‌فڕۆكه‌خانه‌كان نییه‌و ئه‌نجامی لێكۆڵینه‌وه‌كانی هه‌ردوو لیژنه‌ی په‌رله‌مان و حكومه‌تی عیراقیش ئه‌و راستییه‌ی پشتڕاستكردوه‌ته‌وه‌".

ده‌قی چاوپێكه‌وتنه‌كه‌:

* دوای سه‌ردانه‌كه‌ی قاسم ئه‌عره‌جی راوێژكاری ئاسایشی نه‌ته‌وه‌یی عیراق بۆ سلێمانی و كۆبوونه‌وه‌ی له‌گه‌ڵ قوباد تاڵه‌بانی جێگری سه‌رۆك وه‌زیرانی هه‌رێم، راگه‌یه‌نراوێكی بڵاوكرده‌وه‌ و تییدا رایگه‌یاندوه‌: "به‌پێی لێكۆڵینه‌وه‌كان هیچ كه‌سێكی بیانی سەربازی و مه‌ده‌نی له‌ فڕ‌ۆكه‌خانه‌كانی سلێمانی و عه‌ربه‌تدا نین، كه‌واته‌ بۆ هێرش ده‌كرێته‌ سه‌ر فڕۆكه‌خانه‌كانی سلێمانی؟


-هه‌رێم كه‌مال ئاغا: "وێڕ‌ای سه‌ردانه‌كانی قاسم ئه‌عره‌جی، له‌ رابردووشدا چه‌ند لیژنه‌یه‌كی په‌رله‌مان له‌ناویاندا لیژنه‌ی ئاسایش و به‌رگری بۆ لێكۆڵینه‌وه‌ له‌ راستی رووداوه‌كان سه‌ردانی سلێمانییان كرد، ئێمه‌ له‌ لیژنه‌ی ئاسایش و به‌رگری دوای لێكۆڵینه‌وه‌ راپۆرته‌كانمان ئاڕاسته‌ی سه‌رۆكایه‌تی په‌رله‌مان و حكومه‌ت كردوه‌و به‌پێی به‌دواداچون و به‌ڵگه‌كان بۆمان ده‌ركه‌وت، ئه‌وه‌ی كه‌ به‌رامبه‌ر فڕۆكه‌خانه‌ی سلێمانی و عه‌ربه‌ت كراوه‌ سیاسییه‌ و جگه‌ له‌ پێشێلكردنی سه‌روه‌ری ئاسمانی عیراق هیچ واتایه‌كی دیكه‌ هه‌ڵناگرێت ، چونكه‌ هه‌موو ئه‌و به‌ڵگانه‌ی له‌ لێكۆڵینه‌وه‌كانماندا ده‌ستمانكه‌وتوون ئه‌وه‌ ده‌سه‌لمێنێت، كه‌ هێرشه‌كان ناڕ‌ه‌وان، هه‌ربۆیه‌ داوامان له‌ حكومه‌تی عیراق كردوه‌ رێگری بكات له‌پێشێلكردنی سه‌روه‌ری خاك و ئاسمانی عیراق له‌لایه‌ن توركیاوه‌، چونكه‌ هه‌موو ئه‌و هێرشانه‌ وایكردووه‌ گوزه‌رانی خه‌ڵك به‌بارودۆخێكی خراپدا بڕ‌وات و خه‌ڵكی سلێمانی له‌ فڕۆكه‌خانه‌كانی خۆیان بێبه‌شبكرێن، هه‌روه‌ها به‌هۆی ئه‌و گه‌مارۆیه‌ی توركیا خستویه‌تییه‌ سه‌ر ئه‌و گه‌شتیارانه‌ی كه‌له‌ فڕۆكه‌خانه‌ی سلێمانییه‌وه‌ به‌ ئاسمانی توركیادا گه‌شت ده‌كه‌ن، كاریگه‌ری له‌سه‌ر گه‌شتیاران و فڕۆكه‌خانه‌ی سلێمانی دروستكردوه‌و پێویسته‌ حكومه‌تی عیراق ئه‌و كێشه‌یه‌ چاره‌سه‌ر بكات، له‌گه‌ڵ ئه‌وه‌شدا سه‌ردانیكردنه‌كه‌ی قاسم ئه‌عره‌جی بۆ سلێمانی ئه‌و راستییانه‌ی سه‌لماند كه‌ فڕۆكه‌خانه‌كانی سلێمانی مه‌ده‌نین و له‌ژێر چاودێری ده‌سه‌ڵاتی فڕۆكه‌وانی عیراقدان".


*لیژنه‌كان چه‌ند جار سه‌ردانی سلێمانیان كردوه‌؟

 
-  هه‌رێم كه‌مال ئاغا: "ئێمه‌ وه‌ك لیژنه‌ی ئاسایش و به‌رگری له‌ په‌رله‌مان دووجار سه‌ردانی فڕۆكه‌خانه‌كانی سلێمانیمان كردوه‌و لیژنه‌كانی حكومه‌تی عیراقیش سێجار سه‌ردانی سلێمانییان كردوه‌، ئه‌نجامی سه‌رجه‌م سه‌ردان و لێكۆڵینه‌وەكان به‌ڕاپۆرت ئاڕاسته‌ی سه‌رۆكایه‌تی په‌رله‌مان و حكومه‌ت كراوه‌و ته‌ئكید له‌وه‌ كراوه‌ته‌وه‌، كه‌ هه‌ردوو فڕۆكه‌خانه‌ی نێوده‌وڵه‌تی سلێمانی و فڕۆكه‌خانه‌ی كشتوكاڵی عه‌ربه‌ت مه‌ده‌نیین و كه‌سی بیانی سه‌ربازی و مه‌ده‌نی تێدانه‌بووه‌، واتا پێشێلكارییه‌كان سیاسی بوون نه‌ك بیانوی دیكه‌، بۆیه‌ ئه‌ركی حكومه‌تی عیراقه‌ رێگری له‌هێرشه‌كان بكات و پارێزگاری له‌ ئاسایش و ئه‌منی هاووڵاتیان بكات".

*ئایا حكومه‌تی عیراق ده‌توانێت هێرشه‌كان رابگرێت ؟

 
هه‌رێم كه‌مال ئاغا:" بێگومان، وه‌ك نوێنه‌رانی كورد و لیژنه‌ی ئاسایش و به‌رگریش داوامان له‌حكومه‌تی عیراق كردوه‌، كه‌ ده‌سه‌ڵاتی خۆی به‌كاربهێنێت و رێگری بكات له‌دووباره‌بوونه‌وه‌ی هێرشه‌كانی سه‌ر فڕۆكه‌خانه‌كان و هه‌وڵی جددی بدات كه‌ ئاسمانی توركیا به‌ڕووی فڕۆكه‌خانه‌ی نێوده‌وڵه‌تی سلێمانیدا بكاته‌وه‌، چونكه‌ خه‌ڵك و گه‌شتیاران له‌و بڕیاره‌ی توركیا زه‌ره‌رمه‌ندبوون".
 

PUKMEDIA