قوباد تاڵەبانی: رێگە نەدرێت سەقامگیری عیراق بكەوێتە مەترسییەوە

نوسینگەی قوباد تاڵەبانی

قوباد تاڵەبانی جێگری سەرۆكوەزیران و ئەلینا رۆمانۆسكی باڵیۆزی ئەمریكا لە عیراق

قوباد تاڵەبانی جێگری سەرۆكوەزیران پێشوازی لە ئەلینا رۆمانۆسكی باڵیۆزی ئەمریكا لە عیراق كرد و لە كۆبوونەوەی نێوانیاندا دۆخی ئەمنی ناوچەكە و چەند پرسی دیكەی جێی بایەخی هەردوولا تاوتوێ كران.

لە تەوەری سەرەكی كۆبوونەوەكەدا كە رۆژی 1ی نۆڤەمبەری 2023 لە هەولێر بەڕێوەچوو و مارك سترۆ كونسوڵی گشتیی  ئەمریكا لە هەرێم ئامادەی بوو،  گفتوگۆكرا لە بارەی دۆخی ئەمنی ناوچەكە و لەمبارەیەوە، جێگری سەرۆكوەزیران نیگەرانی خۆی لە ئەگەری پەرەسەندنی بارگرژییەكان دەربڕی و داوای كرد حكومەتی فیدراڵ و لایەنە عیراقییەكان بە هەستیارییەوە مامەڵە لەگەڵ ئەم بارودۆخەدا بكەن و رێگە نەدەن ئاسایش و سەقامگیری عیراق بكەوێتە مەترسییەوە.

قوباد تاڵەبانی ئاماژەی بەوەشدا: "لە ئەگەری پەرەسەندنی ئاڵۆزییەكاندا، هەموو ناوچەكە زیانی بەردەكەوێت، هەربۆیە پێویستە كۆمەڵگای نێودەوڵەتی و بە تایبەتیش وڵاتانی كاریگەری ناوچەكە لەڕێگەی دیپلۆماسییەوە هەموو هەوڵەكانیان بخەنەگەڕ بۆ هێوركردنەوەی بارگرژییەكان و رێگریكردن لە تێكچوونی زیاتری سەقامگیری ناوچەكە".

هەر لە كۆبوونەوەكەدا دۆخی سیاسی و ئابوری هەرێمی كوردستان و پەیوەندییەكانی نێوان هەرێم و بەغدا و چۆنییەتی چارەسەركردنی گرفتەكانی بەردەم جێبەجێكردنی یاسای بودجە تاوتوێ كران.

PUKMEDIA