قوباد تاڵەبانی: كۆڕبەندی ساڵانەی نێودەوڵەتی داهێنانی گەنجان ئەنجامدەدەین

پەڕەی قوباد تاڵەبانی

قوباد تاڵەبانی ژمارەیەك لە گەنجان

قوباد تاڵەبانی جێگری سەرۆكوەزیران رایدەگەیەنێت: "كۆڕبەندێكی ساڵانەی نێودەوڵەتی داهێنان و كارسازیی بۆ گەنجانی كوردستان لەشاری سلێمانی سازدەكەین و گەنجانمان تێگەیشتنی قوڵ و عەقڵی فراوانیان هەیە"، لە پەیامێكیشیدا بۆ گەنجان دەڵێت: "لەگەڵتان بووم و لەگەڵتان دەبم".

قوباد تاڵەبانی جێگری سەرۆكوەزیرانی هەرێم لە پەڕەی تایبەتی خۆی لە فەیسبوك رایدەگەیەنێت: "جیاواز لەكۆبوونەوە و كۆڕبەندە سیاسییەكانی كوردستان و تەنانەت عیراقیش، لەماوەی نزیكی داهاتوودا كۆڕبەندێكی ساڵانەی نێودەوڵەتی داهێنان و كارسازیی بۆ گەنجانی كوردستان لەشاری سلێمانی دەكەین".

راشیدەگەیەنێت: "ئەمڕۆ گفتوگۆیەكی بەسوودم لەشارە حەیاتەكە لەگەڵ ژمارەیەك لە گەنجانی بە توانا و كارساز هەبوو، ئەوان تێگەیشتنی قوڵ و عەقڵی فراوانیان هەیە، لەوە تێگەیشتوون حكومەت ئەگەر هیچ كێشەیەكی داراییشی نەبێت، ناتوانێت بە تەنها چارەسەری هەموو كێشەیەك بكات، بۆیە پشت ئەستوور بە توانا و عەقڵی داهێنەرانەی خۆیان هەوڵی كارسازی دەدەن و هەلی كاركردن بۆ گەنجی دیكەش دەستەبەر دەكەن".

جێگری سەرۆكوەزیرانی هەرێم راشیدەگەیەنێت: "لەگەڵتان بووم، بەردەوامیش لەگەڵتان دەبم".

PUKMEDIA