قوباد تاڵەبانی: پشتیوانی مامۆستایانین

PUKMEDIA

قوباد تاڵەبانی جێگری سەرۆكوەزیرانی هەرێمی كوردستان

جێگری سەرۆكوەزیرانی هەرێمی كوردستان رایدەگەیەنێت: "مامۆستایان مافی خۆیانە مووچە لەكاتی خۆیدا وەربگرن ئێمەش پشتیوانیانین، بۆ مووچەی فەرمانبەرانیش فشارمان لە حكومەتی فیدراڵ كردووە، بۆیە هیوادارین دەرگای خوێندنگەكان بكرێنەوە و خوێندكاران لە خوێندن بێبەش نەبن".

لە مەڕاسیمی كردنەوەی پێنجەمین پێشانگای نێودەوڵەتی سلێمانی بۆ كتێب، قوباد تاڵەبانی جێگری سەرۆكوەزیرانی هەرێمی كوردستان، لەوەڵامی پرسیاری رۆژنامەنووساندا رایگەیاند: "لە كێشە و ناڕەزاییەكانی مامۆستایان و مووچەخۆران تێدەگەین مافی خۆیانە لە كاتی خۆیدا مووچەكانیان وەربگرن ئێمەش پشتیوانیان دەبین، هیوادارین مامۆستایان بە جۆر و شێوەی تر ناڕەزاییەتییەكانیان دەرببڕن بۆ ئەوەی دەرگای خوێندنگەكان بكرێنەوە و خوێندكاران لە خوێندن بێبەش نەبن، هاوكات دەشبێت بەغدا پابەندی یاسای بوودجە بێت و لە كاتی خۆیدا مووچەی فەرمانبەران بنێرێت، چونكە هەرێم پابەندە".


وتیشی: "بۆ مووچەی فەرمانبەران فشارمان لە حكومەتی فیدراڵ كردووە پارەی سێ مانگەكەی دیكەش بنێرێت، بۆ ئەو مەبەستەش لە گفتوگۆداین، چونكە ئاشكرایە لە بابەتی مووچە و شایستە داراییەكانی هەرێمدا عیراق 
غەدر لە هەرێم دەكات".

قوباد تاڵەبانی لەبارەی پەیوەندییەكانی یەكێتی لەگەڵ حزب و لایەنەكانی دیكەی هەرێم رایگەیاند: "لەدوای پێنجەمین كۆنگرەی یەكێتیی نیشتمانیی كوردستانەوە و یەكێتی بڕیاری دەستپێشخەری بۆ یەكڕیزی لەگەڵ لایەنەكان داوە و بۆ ئەو مەبەستەش كۆبوونەوەكان لەگەڵ پارتی دیموكراتی كوردستان دەستیپێكردووە، لە داهاتووشدا بۆ هەمان مەبەست سەردانی حزبەكانی دیكە دەكات".

ئەمڕۆ پێنج شەممە 23-11-2023، پێنجەمین پێشانگای نێودەوڵەتی سلێمانی بۆ كتێب لەلایەن قوباد تاڵەبانی جێگری سەرۆكوەزیرانی هەرێمی كوردستان كرایەوە و دە رۆژ بەردەوام دەبێت، كە تێیدا زیاتر لە 200 ناوەندی چاپ و بڵاوكردنەوە و رۆشنبیری لەسەر ئاستی هەرێم و عیراق و جیهان تێیدا بەشدارن. 

PUKMEDIA