مەکتەبی سیاسی: یەکێتی بڕوای بە خەبات و یەکسانی ژنان هەیە

PUKMEDIA

لۆگۆی یەکێتی

مەكتەبی سیاسی یەكێتیی نیشتیمانی كوردستان بۆ 25ی نۆڤەمبەر رۆژی بەرەنگاربوونەوەی توندوتیژی دژی ژنان و كچان پەیامێكی بڵاوكردەوە و رایگەیاند: "یەكێتی وەك حزبێكی سۆشیالیست دیموكراتی و پێشكەوتنخواز، بڕوای پتەوی بە خەباتی ژنان و یەكسانی و نەهێشتنی جیاكاری و ستەم هەیە، پێویستیشە بنەمای یاسایی بۆ مافەكانی ژنان دابندرێت و حكومەت و دەزگا پەیوەندیدارەكان پابەند بكرێن بە جێبەجێ‌ كردنییەوە".

دەقی پەیامەکە:

رۆژی 25 نۆڤەمبەری هەموو ساڵێك ، رۆژی هاتنە کۆڕی خەباتی ژنانە دژ بە ستەم و نادادی و جیاكاری و چەوساندنەوە و توندوتیژی، ئەو رۆژە  بۆتە سیمبول بۆ ژنان تا لەرێگەیەوە لەسەرتاسەری دونیا، وەك بۆنەیەكی رەسمی چالاكی و گردبوونەوە بكرێت ،گوزارشت لە داواكاری و پەیامە یەكسانخوازەكەی ژنان  بكرێت.

  نەتەوەیەكگرتووەكان بە رەسمی ئەم رۆژی دیاریكردووە و بۆنەکەش هەموو ئەو لایەنانە دەگرێتەوە كە كاریگەریان  بەسەر ژنانەوە هەیە بە هەموو جۆرەكانی توندوتیژی وەك (نایەكسانی و جیاكاری، توندوتیژی ناو خێزان، توندوتیژی جەستەیی و دەرونی ،دەستدرێژی سێكسی، بازرگانیكردن بە ژنان و خەتەنەكردنی مێینە...هتد)

یەكێتیی نیشتمانی كوردستان، وەك حزبێكی سۆشیال دیموکراتی و پێشکەوتنخوازی دەربەست بۆ خەمی كۆی چین و توێژەكانی كۆمەڵگە بڕوای پتەوی بە خەباتی ژنان و یەكسانی و نەهێشتنی جیاكاری و ستەم هەیە، لەسەر ئەم دیدە كە بەشێكە لە رێبازە دروستەكەی سەرۆك  "مام جەلال "بەردەوام دەبێت ، لە پێناو ئەوەی ژنان بگەن بە مافەكانیان و جیاكاری بنەبڕ بكرێت و وڵات لەسەر پرەنسیپی وەكیەكی و یەكسانی بینابكرێت. بۆ ئەمەش  پێویستە بنەمای یاسایی بۆ مافەكانی ژنان دابندرێت  و حكومەت و دەزگا پەیوەندیدارەكان پابەند بكرێن بە جێبەجێ‌ كردنییەوە.

سەرکەوێ خەباتی ژنان دژی توندوتیژی و پایەدار بێت کوردەوارییەکی دروست و چوون یەک لە سایەی ئاشتی کۆمەڵایەتی و دادپەوەریدا


مەكتەبی سیاسی
یەكێتیی نیشتمانی كوردستان
25/11/2023

PUKMEDIA