قوباد تاڵه‌بانی: بۆ له‌مه‌ودوا چاكسازی وه‌زاره‌تی پێشمه‌رگه‌ به‌لاوازی به‌ڕێوه‌نه‌چێت

نووسینگەی جێگری سەرۆك وەزیران

قوباد تاڵەبانی جێگری سەرۆك وەزیران و شۆڕش ئیسماعیل وەزیری پێشمەرگە

بەئامادەبوونی قوباد تاڵەبانی جێگری سەرۆك وەزیران،  شۆڕش ئیسماعیل گەڕایەوە بۆ ئەركەكەی وەك وەزیری پێشمەرگە.

بەبۆنەی گەڕاندنەوەی، شۆڕش ئیسماعیل وەزیری پێشمەرگە، لە كۆبوونەوەیەكدا كە ئەمڕۆ ٢٧ی نۆڤەمبەری ٢٠٢٣، لە دیوانی وەزارەت، بە ئامادەبوونی بریكاری وەزیر و سەرۆكی دەستەی ئەركان و ئەمینداری گشتی و ژمارەیەك لە ئەفسەرانی پلەباڵای وەزارەت بەڕێوەچوو، قوباد تاڵەبانی جەختی كردەوە كە دەبێت گلەیی و ناكۆكییەكان وەلابنرێن و پێكەوە وەك یەك تیم كار بكەن.  

وتیشی: "ئاساییە ناكۆكی هەبێت لەنێوان لایەنە سیاسییەكان بەڵام بەهیچ شێوەیەك نابێت ئەو ناكۆكییانە لەناو وەزارەت رەنگ بداتەوە، ئەفسەران و پلەباڵاكانی وەزارەت دەبێت وەك یەك تیم بە شێوەیەكی پیشەییانە پێكەوە كاربكەن".

جێگری سەرۆك وەزیران ئاماژەی بە گرنگیی جێبەجێكردنی خاڵەكانی پڕۆسەی چاكسازی و رێكخستنەوەی هێزی پێشمەرگەی كوردستانی كرد، و رایگەیاند: "هاوكاری و هەماهەنگی هاوپەیمانان بەرز دەنرخێنین و بۆ لەمەولا نابێت پرۆسەی چاكسازی بە خاوی و لاوازی بەڕێوەبچێت".
 
داواشیكرد ئەفسەران و پلەباڵاكانی وەزارەت بە روحی هەست كردن بە ئەركی نیشتمانی كار بكەن لەپێناو جێبەجێ كردنی هەموو خاڵەكانی چاكسازی.

دواتر شۆڕش ئیسماعیل وەزیری پێشمەرگە، ئاماژەی بەوەدا كە پێویستی بە پشتیوانی هەموو لایەكە لەپێناو سەرخستنی كاروباری وەزارەت دوور لە ململانێی سیاسی، وتیشی: "كاری وەزارەت و هێزەكانی پێشمەرگە پیرۆزە و دەبێت لێكتێگەیشتنمان هەبێت بۆ باشتر بەجێگەیاندنی ئەركەكانمان".

 جەختی لەوەش كردەوە كە لە قۆناغی داهاتوودا كاری باشتر دەكرێت وەكو یەك تیم.

PUKMEDIA