سەرۆک بافڵ: پەرە بەپەیوەندی گەلی کورد و چین بدرێت

نووسینگەی سەرۆكی یەكێتی

پێشوازیی بافڵ جەلال تاڵەبانی سەرۆكی یەكێتی لە كونسوڵی كۆماری میللی چین

بافڵ جەلال تاڵەبانی سەرۆكی یەكێتیی نیشتمانیی كوردستان، لە دەباشان پێشوازیی لە لیو جیون، كونسوڵی كۆماری میللی چین لە هەرێم كرد.

لەدیدارێكدا كە شاناز ئیبراهیم ئەحمەد ئەندامی مەكتەبی سیاسی ئامادەبوو، سەرۆك بافڵ جەلال تاڵەبانی ویستی یەكێتیی نیشتمانیی كوردستانی بۆپتەوكردنی زیاتری هەماهەنگییەكان لەگەڵ كۆماری چینی میللی لە هەموو بوارەكاندا دەربڕی و هیوای خواست، ئەو پەیوەندییە مێژووییەی نێوان گەلی كورد و چین كە سەرۆك مام بناغەدانەرێتی، گەشە بكات و پەرەی پێبدرێت.

لەدرێژەی دیدارەكەدا سەرۆك بافڵ هانی كۆمپانیا چینییەكانی دا تاوەكو بەشدارییەكی كاریگەرتر و چالاكیی زیاتریان هەبێت لە پێشخستنی ئابووری هەرێم و هەموو پشتیوانییەكیشی بۆ دووپاتكردنەوە.

هەر لە دیدارەكەدا دواین گۆڕانكارییە سیاسی، ئابووری و ئەمنییەكان لەسەر ئاستی هەرێم و عیراق گفتوگۆیان لەبارەوەكرا و جەخت لە چارەسەركردنی ئاشتییانەی كێشەكان و بەردەوامی گفتوگۆ و لێكتێگەیشتن كرایەوە لە پێناو پاراستنی سەقامگیری و زاڵبوون بەسەر ئاڵنگارییەكاندا.

PUKMEDIAٍٍ