سه‌رۆك بافڵ: ئه‌ركی هه‌موومانه‌ وڵات له‌ئه‌گه‌ری نه‌خوازراو بپارێزین

PUKMEDIA

بافڵ جەلال تاڵەبانی سەرۆكی یەكێتیی نیشتمانیی كوردستان و محەمەد شیاع سودانی سەرۆكوەزیرانی عیراق

بافڵ جەلال تاڵەبانی سەرۆكی یەكێتیی نیشتمانیی كوردستان،  لەگەڵ محەمەد شیاع سودانی سەرۆكوەزیرانی عیراق، لە بەغدا كۆبووەوە.

لە كۆبوونەوەكەدا دۆخی گشتیی وڵات و هەوڵەكانی حكومەت بۆ پێشكەشكردنی خزمەتگوزاریی زیاتر گفتوگۆی لەبارەوەكرا و جەخت لە هەماهەنگی و هاریكاریی نێوان هێز و لایەنە سیاسییەكان كرایەوە لەپێناو چارەسەركردنی كێشەكان و پاراستنی سەقامگیریی لە ناوچەكە.


لەدرێژەی كۆبوونەوەكەدا سەرۆك بافڵ جەلال تاڵەبانی ئاماژەی بە هەوڵەكانی وەفدی هەرێم كرد بۆ گەیشتن بە رێككەوتنێكی نیشتمانی لەگەڵ بەغدا و روونیكردەوە: "گەڕانەوە بۆ دەستوور و هاوبەشیی راستەقینە، فاكتەری سەرەكی چارەسەركردنی كێشەكانە". وتیشی: "ژیان و گوزەرانی خەڵك دەبێت كاری لەپێشینەی حكومەت بێت و هەموولایەكیش هاوكار و هەماهەنگبن لەو پێناوەدا".

لەبارەی پێشهاتە ئەمنییەكانی ناوچەكە و لێكەوتەكانییەوە، سەرۆك بافڵ سیاسەتی یەكێتی خستەڕوو و رایگەیاند: "ناوچەكە بە قۆناغێكی هەستیاردا تێدەپەڕێت، ئەركی هەموولایەكە بەرپرسیارانە مامەڵە بكەن و وڵات لە هەموو ئەگەرێكی نەخوازراو بپارێزن".

PUKMEDIA