دژەتیرۆ: هیچ دوژمنێك توانای نییە بەرامبەرمان بوەستێت

PUKMEDIA

لۆگۆی بەڕێوبەرایەتی گشتی دژەتیرۆر

بەڕێوبەرایەتی گشتی دژەتیرۆر لە راگەیەندراوێكدا رایگەیاند: "شەش ساڵ لەمەوبەر، دوای ئازادكردنی دوایین ناوچەی كە لەلایەن تیرۆرستانی داعشەوە داگیركرابوو، سەركەوتنی كۆتایی بەسەر ئەو رێكخراوە تیرۆرستییەدا راگەیاندرا".

راشیانگەیاند: "لەپێناو ئەم سەركەوتنە مێژووییە بەسەر تیرۆردا، گەلی كوردستان و عیراق قوربانییەكی زۆریان بەخشی و ئەنجامی ساڵانێكی زۆر جەنگ و دەیان هەزار شەهید و بریندار بوون".

ئەوەشخراوەتەڕوو: "بێگومان لە یەكەم رۆژەوە، وڵاتانی دراوسێ و هەرێمی و جیهان هاوكاری مرۆیی و سەربازییان گەیاندە دەست هێزە كوردیی و عیراقییەكان بۆ روبەڕوبوونەوەی داعش، هاوپەیمانان پشت و پەنایەكی بە‌هێز بوون لەو جەنگەدا، بەڵام ئەوەی راستییە و دەبێت هەمووان دركی پێبكەن ئەوەیە كە سەركەوتن لەو جەنگە سەپێندراوەدا، ئەنجامی یەكگرتوویی و یەك هەڵوێستی بوو، ئەوەشی بۆ سەلماندین كاتێك دەستمان لەناو دەستی یەكە، هیچ دوژمنێك توانای ئەوەی نییە بەرامبەرمان بوەستێت.

لەڕاگەیەندراوەكەدا ئاماژە بەوەكراوە: "بە شانازییەوە هێزی دژەتیرۆر – CTG قارەمانانە توانی لەو جەنگەدا خۆی بسەلمێنێت و ببێتە سەرە رمی هێرشەكان و قەڵغانی پاراستنی كوردستان، رۆژێك لە هەولێر و رۆژێك لە كەركوك، تا دەگاتە مەخمور و جەلەولا و خانەقین و دەیان ناوچەی دیكە، دژەتیرۆر هەردەم لە ئامادەباشیدابووە بۆ قوربانیدان لەپێناو پاراستنی خاكەكەمان لە دەستی نەیارانی ژیان و ئاشتی، دەست بە سنگەوە دەگرین بۆ سەرجەم شەهیدانی دەستی تیرۆر و لە خودای گەورە داواكارین شیفا بۆ برینداران و شەهیدە زیندووەكان بنێرێت".

PUKMEDIA