نێروەیی: یەكێتی و پارتی پێكەوە دەتوانن خزمەتی زیاتر بكەن

PUKMEDIA

لەتیف نێروەیی لێپرسراوی بۆردی راگەیاندنی یەكێتیی نیشتمانیی كوردستان

لەتیف نێروەیی لێپرسراوی بۆردی راگەیاندنی یەكێتیی نیشتمانیی كوردستان رایدەگەیەنێت: "یەكێتی و پارتی پێكەوە دەتوانن لە كەركوك و نەینەوا كە خاوەنی زۆرترین ژمارەی كورسی ئەنجومەنی پارێزگاكانن دانوستان و گفتوگۆی سەركەوتوو بكەن" و دەستپێشخەریی و پەیامی محەمەد كەمال بەپرسی لقی سێی پارتی دیموكراتی كوردستان لە كەركوك بەگرنگ دەزانێت كە دەڵێت: "دانانی پارێزگاری كەركوك مافی یەكێتییە".

لێپرسراوی بۆردی راگەیاندنی یەكێتیی نیشتمانیی كوردستان لەلێدوانێكیدا بە PUKMEDIA راگەیاند: "یەكێتی و پارتی پێكەوە لەناوچە دابڕێندراوەكان لە نەینەواوە تا دەگاتە خانەقین و دیالە بەرپرسیارێتییەكی هاوبەشیان هەیەو لەبەرنامەی یەكێتیشدا هەیە دوای راگەیاندنی ئەنجامی كۆتایی هەڵبژاردنەكە دەست بەدانوستان بكات لەگەڵ پارتی دیموكراتی كوردستان".

"گرنگە یەكێتی و پارتی بە نزیكبوونەوەو پێكەوە بگەنە ئەنجامێكی هاوبەش و لەگەڵ لایەنەكانی دیكە بكەونە گفتوگۆوە بۆ پێكهینانی ئەنجومەن و ئیدارەیەكی خزمەتگوزار لەپارێزگاكانی كەركوك و نەینەوا، كە لەو رێگەیەوە دەتواندرێت پشكی باشتر بۆ كورد مسۆگەرتر بكرێت" لەتیف نێروەیی وایوت.

محەمەد كەمال بەرپرسی لقی سێی كەركوكی پارتی دیموكراتی كوردستان لە لێدوانێكی رۆژنامەوانیدا رایگەیاند: "بەپێی ئەنجامی هەڵبژاردنەكان، مافی یەكێتیی نیشتمانیی كوردستانە وەك لیستی یەكەم و براوە پارێزگاری كەركوك دیاریی بكات و دواتر لەگەڵ پارتی و لایەنەكانی تر بكەوێتە گفتووگۆ و دانوستان".

"بەبێ رێككەوتن نە یەكێتی دەتوانێت پارێزگار دابنێت نە عەرەب، بەو پێیەی یاساكە وا دانراوە كە كێشەكانی كەركوك بەردەوام بێت"، محەمەد كەمال وادەڵێت.

لەهەڵبژاردنی ئەنجومەنی پارێزگای كەركوك كە لە رۆژانی 16 و 18 ی ئەم مانگە بەڕێوەچوو، هاوپەیمانی كەركوك هێزو ئیرادەمانە كە یەكێتیی نیشتمانیی كوردستان و حزبی شیوعی پێكەوە بەهاوپەیمانێتییان كرد، زۆرترین دەنگ و كورسی ئەنجومەنی پارێزگای كەركوكیان بەدەستهێنان و براوەی یەكەم بوون، بەگوێرەی ئەنجامی بەرایی، هاوپەیمانێتییەكە خاوەنی 5 كورسی دەبێت، لەكۆی 15 كورسی، پارتی دیموكراتی كوردستانیش خاوەنی 2 كورسی دەبێت، كە پێكەوە دەكاتە 7 كورسی.

لە پارێزگای نەینەواش یەكێتیی نیشتمانیی كوردستان خاوەنی 2 كورسییەو پارتی دیموكراتی كوردستانیش خاوەنی 4 كورسییە، كە بەهەردووكیان ژمارەكەیان دەگاتە 6 كورسی ئەنجومەنی پارێزگاكە.

لێپرسراوی بۆردی راگەیاندنی یەكێتی وتیشی:" یەكێتی و پارتی پێكەوە دەبنە خاوەنی كورسی و ئیرادەی بەهێزتر بۆ گفتوگۆو دانوستان لەگەڵ پێكهاتەكانی دیكە، بەو پێیەی ناوچە جێناكۆكەكان بۆ كورد پرسێكی نیشتمانیی و گرنگە، بەتایبەت بۆ كەركوك كە چەندین ساڵە كێشەی لەسەرە".

"ئەگەر یەكێتی و پارتی پێكەوەبن لە كەركوك و نەینەوا دەبنە فراكسیۆنێكی بەهێزو یەكەم و دەتوانین خزمەتی زیاتر بكەین لەو ناوچانەی كە زۆرینەیان كوردن و چاویان لەدەستی هەردوو حزبی كوردستانییە"، لەتیف نێروەیی وادەڵێت.

PUKMEDIA