سەرۆككۆمار: بەپشتبەستن بە ماددەی 140 گۆڕانكارییە دیمۆگرافییەكان چارەسەربكرێن

نوسینگەی راگەیاندنی سەرۆكایەتی كۆمار

كۆبوونەوەوی سەرۆككۆمار لەگەڵ وەزیرانی دادو ژینگەو لیژنەی باڵای جێبەجێكردنی ماددەی 140

د. لەتیف جەمال رەشید سەرۆككۆماری عیراق جەخت لەسەر بایەخی دۆزینەوەی چارەسەر بۆ كێشە هەڵپەسێردراوەكانی كەركوك و ناوچە جێناكۆكەكان دەكاتەوە.

ئەمڕۆ 7-1-2024 لە كۆشكی بەغدا ، سەرۆككۆمار پێشوازی لە خالید شوانی وەزیری داد و نزار محەمەد سەعید ئامێدی وەزیری ژینگە كرد، كە ئەبوبەكر سدیق ئەندامی لیژنەی باڵای جێبەجێكردنی ماددەی (140) و ژمارەیەك لە لێپرسراوان ئامادەیبوون.

لە میانی دیدارەكەدا باس لە بارودۆخی ئەمنی و سیاسی وڵات و شاری كەركوك و ناوچە جێناكۆكەكان بەتایبەتی كرا، سەرەڕای تاووتوێكردنی پەیوەندی نێوان حكومەتی فیدراڵی و هەرێمی كوردستان.

سەرۆككۆمار جەختی لە گرنگی پاراستنی دەستكەوتەكان كردەوە بۆ بەرقەراركردنی ئاسایش و سەقامگیری، باشتركردنی ئاستی بژێویی هاووڵاتیان، بەهێزكردنی یەكێتی نیشتمانی و بەدیهێنانی دادپەروەری كۆمەڵایەتی.

هەر لە دیدارەكەدا، كارەكانی لیژنەی باڵای ماددەی (140)ی دەستوور خرانەڕوو، لەوبارەیەوە سەرۆككۆمار پێویستی بەدواداچوون بۆ كاراكردنی بڕیارەكانی لیژنەكە لەڕێگەی كاری هاوبەش لەگەڵ دامودەزگا حكومییەكان دووپاتكردەوە، بەشێوەیەك كە پاراستنی مافی هاووڵاتیان و پێكهاتەكانی ناو كەركوك مسۆگەربكات.

هەروەك سەرۆك كۆمار جەختیكردەوە لەسەر بایەخی دۆزینەوەی چارەسەر بۆ كێشە هەڵپەسێردراوەكانی كەركوك و ناوچە جێناكۆكەكان لەڕێی جێبەجێكردنی یاسا و پیادەكردنی دیالۆگ و لێكتێگەیشتن لەژێر رۆشنایی تەوافوقی سیاسی لەنێوان هێزە سیاسییەكاندا. 

لە دیدارەكەدا، ئەنجامەكانی هەڵبژاردنی ئەنجومەنی پارێزگاكان و رێژەی باشی بەشداریكردنی هاووڵاتیان لە دەنگدان لە پارێزگای كەركوكدا خرایەڕوو، لەم چوارچێوەیەشدا سەرۆككۆمار دووپاتیكردەوە، كە پێویستە پەلە بكرێت لە پێكهێنانی حكومەتی خۆجێی لە پارێزگای كەركوك لەپێناو جێبەجێكردنی ئەركەكانی و یەكلاكردنەوەی كێشەكانی پارێزگاكە و ناوچە جێناكۆكەكان بەشێوەیەك ماف بۆ خاوەنەكانیان بگەڕێندرێتەوە و زیانلێكەوتوان قەرەبوبكرێنەوە و دەرهاویشتە كەڵەكەبووەكانی بڕیارە ناڕەواكانی ئەنجومەنی سەركردایەتی شۆڕشی هەڵوەشاوە، چارەسەربكرێن، كە  بەئامانجی گۆڕینی دیمۆگرافی دەریكردبوون.

لەلایەن وەزیرانی داد و ژینگەوە ستایشی تێڕوانینەكانی سەرۆك كۆمار كرا لەبارەی جێبەجێكردنی بڕیارەكانی ماددەی 140 ی دەستوور، كە دەبنەهۆی چارەسەركردنی سەرجەم كێشەهەڵپەسێردراوەكان بەگوێرەی یاسا و تەوافوقی نێوان لایەنە سیاسییەكان.

هەروەها ئەبوبەكر سدیق ئەندامی لیژنەی باڵای جێبەجێكردنی ماددەی 140 رونكردنەوەی لەبارەی كارەكانی لیژنەكە و ئەوەی بە ئەنجامگەیشتووە و ئاستەنگەكانی بەردەم تەواوكردنی كارەكان پێشكەشكرد، جگە لە خستنەڕوی كۆمەڵێك پێشنیار بۆ پاڵپشتیكردنی كارەكانی لیژنەكە و ئەنجامدانی ئەركەكانی.

PUKMEDIA