سەنتەری رۆشنبیری عەرەبی – کوردی لە بەغدا دەکرێتەوە

PUKMEDIA

مەراسیمی کردنەوەی سەنتەری رۆشنبیری عەرەبی – کوردی

بە ئامادەبوونی د. لەتیف جەمال رەشید سەرۆک کۆماری عیراق و شاناز ئیبراهیم ئەحمەد خانمی یەکەمی عیراق و هەردوو وەزیری رۆشنبیری عیراق و حکومەتی هەرێمی کوردستان، بۆ یەکەم جار سەنتەری رۆشنبیری عەرەبی – کوردی لە بەغدا کرایەوە.

سەرۆک کۆمار: کورد بەشداری لە بونیاتنانی کلتوری عەرەبیدا کردووە

لە مەراسیمەکەدا د. لەتیف جەمال رەشید سەرۆک کۆماری عیراق وتارێکی پێشکەش کرد و رایگەیاند: "سەنتەرەکە خواستی ئەوەیە کە کارلێکی کلتوری بەهێز بکات لەنێوان رۆشنبیرانی عیراقی بە عەرەب و کوردەوە بەجۆرێک کە یارمەتیدەربێت بۆ پتەوکردنی پێکەوەژیان و پەرەپێدانی ئاڵوگۆڕی مەعریفی ئەدەب و زانستە جۆراوجۆرەکان".

"مێژووش شاهێدی چەندین هاوبەشی کلتورییە، لە دیارترینیشیان هەوڵەکانی بەشێک لە رۆشنبیرانی کوردە کە بەشدارییان کردووە لە ئەدەب و زانستی زمانی عەرەبی و هونەرە جۆراوجۆرەکاندا، کورد بەشداری کردووە لە بونیاتنانی کلتوری عەرەبیدا و ناوی بیرمەندان و شاعیران و هونەرمەندان و مێژوونووسانی لەوچوارچێوەیەدا درەوشاوەن"، سەرۆک کۆمار وای وت.

ئاماژەی بەوەشدا: "با کار بکەین بۆ خزمەتکردنی فرە کلتوری وڵات و گەلەکەمان، بەشێوەیەک کە ببێتە مایەی بەهێزکردنی یەکێتی نیشتمانی و رێزبگرێت لە هەمەجۆری ئەو یەکگرتووییە ".

دەقی وتاری سەرۆک کۆمار....

بەناوی خودای بەخشندە و میهرەبان
خوشکان و برایان، ئامادەبوانی بەڕێز
ئەم کاتەتان باش..

لەم سیمپۆزیۆمەدا سڵاوتان لێبێت، کە یەکەم چالاکیی ناوەندی ڕۆشنبیری عەرەبی-کوردی پێکدەهێنێت و لەچوارچێوەی ئەو چالاکیانەدایە، کە هەموومان کار بۆ بەردەوامبوون و پەرەپێدانیان دەکەین لە بەغداد و لە هەرێمی کوردستان.

چەند مانگێک لەمەوبەر لەگەڵ رۆشنبیرانی شاری سلێمانی کۆبوینەوە بۆ دانانی بناغەی سەنتەرێکی رۆشنبیری، بۆئەوەی بەشداربێت لە چالاککردنی رۆشنبیریی عەرەبی لە هەرێم و رۆشنبیریی کوردی لە شارەکانی دیکەی عیراقدا.

وەک دەزانن، سەنتەرەکە خواستی بەهێزکردنی پەیوەندییە کلتوورییەکانی نێوان رۆشنبیرانی عیراقی بە عەرەب و کوردەوە هەیە، بەشێوەیەک کە یارمەتیدەربێت لە پتەوکردنی پێکەوەژیان و پەرەپێدانی ئاڵوگۆڕی مەعریفی و ئەدەب و زانستە جۆراوجۆرەکان.

لەڕاستیدا مێژوو چەندین هاوبەشیی کلتوری بەخۆوەبینیوە و  هەوڵەکانی زۆرێک لە رۆشنبیرانی کوردی خستۆتەڕو، کە بەشدارییانکردوە لە ئەدەب و زانستی زمانی عەرەبی و هونەرە جۆراوجۆرەکاندا.

کورد بەشداری کردوە لە بنیاتنانی کلتوری عەرەبیدا و ناوی بیرمەندان و شاعیران و هونەرمەندان و مێژوونوسان لەم چوارچێوەیەدا درەوشاوەن.

لە مێژووی نزیکدا، ناوی جەمیل سدقی زەهاوی، مەعروف ڕەسافی، ئەحمەد شەوقی، محەمەد کورد عەلی، ئەحمەد تەیمور پاشا و چەندین ناوی دیکە، بەدی دەکەین.

هەروەها رۆشنبیرانی کورد بەشدارییان لە هونەرە جۆراوجۆرەکاندا کرد، لێرەدا ئاماژە بە هەردوو دەرهێنەری مەزن، ئەحمەد بەدرخان و مستەفا عەقاد و رۆڵی گرنگیان لە مێژووی سینەمای عەرەبیدا دەکەین.

ئەم کارلێکە کلتورییە، بەدڵنیاییەوە رەنگدانەوەی پێکەوەژیانی باشی نێوان عەرەب و کوردە، کە لەم سەنتەرە رۆشنبیرییەدا بە پەرۆشین بۆ بەرجەستەکردن و گەشەپێدانی.

هەروەها وەرگێڕانی هاوبەشی نێوان زمانەکانی عەرەبی و کوردی ئامرازێکی گرنگی کارلێکی رۆشنبیری و مێژوویین، کە ئێمە کاری لەسەر دەکەین.

چالاکییە هاوبەشەکانی نێوان رۆشنبیرانی عەرەب و کورد بەهەمانشێوە یارمەتیدەرن بۆ هێنانەکایەی کەشێکی ئەرێنی بۆ لێکتێگەیشتن و پەرەپێدانی پرۆژە هاوبەشەکان و ئاڵوگۆڕی زانست و مەعریفە.

لێرەدا ئاماژە بە بایەخی رەخساندنی دەرفەتی گونجاو دەکەین بۆ پێکەوەژیان و کارلێکی کلتوریی میللی لەنێوان هاووڵاتیانی کورد و عەرەب، هەموو هونەرە جۆراوجۆرەکانیش دەتوانن بەشداری بکەن لەم کارەدا و یارمەتیدەربن لە پەرەپێدان و بڵاوکردنەوەی ئەم هونەرانە، کە سامانی رۆشنبیرین بۆ وڵات و کۆمەڵگە بە عەرەب و کوردەوە.

ئەمە بەشێکە لەو ئەرکەی سەنتەرەکە بەنیازە کاری تێدا بکات، هەروەها چەندین لایەن هەن لە بوارەکانی هزر و مەعریفە و مێژو و شیعر و هونەرەکانی دیکەی ئەدەب، کە دەتوانرێت کاریان لەسەر بکرێت و دەتوانن بیرۆکەکانی پەرەپێبدەن و بخرێنە بەرنامەی کاری سەنتەرەکەوە. 

با کاربکەین بۆ خزمەتی فرەکلتوریی وڵات و گەلەکەمان. بەشێوەیەک، کە یەکێتیی نیشتمانی بەهێزبکات و رێز لە هەمەجۆری ناو ئەم یەکگرتووییە، بگرێت.

هیوای سەرکەوتن بۆ ئەم هەنگاوە گرنگە نیشتمانییە دەخوازم.
زۆر سوپاس بۆ ئامادەبوونتان
 دوبارە سڵاوتان لێ بێت.

وەزیری رۆشنبیری هەرێم: سەنتەرەکە بایەخێکی زۆری هەیە

حەمەی حەمەسەعید وەزیری رۆشنبیری و لاوانی حکومەتی هەرێمی کوردستان لە وتەیەکیدا رایگەیاند: "بەناوی خۆم و وەزارەتی رۆشنبیری و لاوانی حکومەتی هەرێمی کوردستنانەوە بەگەرمی پیرۆزبایی دامەزراندنی ئەم سەنتەرە رۆشنبیرییە دەکەین و هیوای سەرکەوتنیان بۆدەخوازین".

"دامەزراندنی سەنتەرێکی رۆشنبیری تایبەت بە هەردوو گەلی عەرەب و کورد لە شاری بەغدای پایتەخت، بایەخێکی زۆری هەیە بۆ ئاشنابوونی زیاتر بە مێژوو، شارستانیەت و کلتوری هەردوو گەلی برا، ئەوەش لە رێگای کاروچالاکی و پرۆژەی کلتوری هاوبەش وەک وەرگێڕانی کتێب بۆ هەردوو زمانی عەرەبی و کوردی"، حەمەی حەمەسەعید وای وت.

راشیگەیاند: "وەک وەزارەتی رۆشنبیری و لاوان هاوکار و پشتیوانی ئەم سەنتەرە رۆشنبیریەین بۆ ئاشنابوون بە کلتوری دەوڵەمەندی یەکتر و قوڵکردنی گیانی برایەتی و پێکەوەژیانی ئاشتییانەی نێوان هەردوو گەلی کورد و عەرەب و پێکهاتە نەتەواییەکانی دیکەی عیراق و هەرێمی کوردستان کە سەدان ساڵە لەم نیشتمانەدا پێکەوە دەژین".
PUKMEDIA