شێركۆ میروەیس: لیوا حسێن مەنسورو فەرماندەكانمان گیانبازی گەورەیان كرد

PUKMEDIA

شێركۆ میروەیس

شێركۆ میروەیس لێپرسراوی مەڵبەندی 8ی رێكخستنی خانەقین لە یادی نۆ ساڵەی شەهیدبوونی لیوا حسێن مەنسووردا رایگەیاند: "لیوا حسێن مەنسوور و سەركردەكانمان لە شەڕی روبەڕوبوونەوەی داعشدا، بۆ پاراستنی خاك و خەڵكەكەمان گیانبازی گەورەیان كرد و خوێنی خۆیان كردە قوربانی".

ئەمڕۆ 31-1-2024، بە ئامادەبوونی د. خەسرەو گوڵ محەمەد، عیماد ئەحمەد، رەوەند مەلا مەحمود، سالار مەحمود ئەندامانی مەكتەبی سیاسی یەكێتیی نیشتمانیی كوردستان و خێزان و بنەماڵەو هەڤاڵان و هاوسەنگەرانی لیوا حسێن مەنسوور، لە یادی نۆ ساڵەی شەهیدبوونیدا مەڕاسیمێك بەڕێوەچوو و شێركۆ میروەیس ئەندامی سەركردایەتی و لێپرسراوی مەڵبەندی 8ی رێكخستنی خانەقینی یەكێتیی نیشتمانیی كوردستان  وتارێكی پێشكەش كردو رایگەیاند: "خانەقین شەهیدەكانی لەیاد ناكات و بەڕێزو وەفاوە یادیان دەكاتەوە، لیوا حسێن مەنسوور و سەركردەكانمان لە شەڕی روبەڕوبوونەوەی داعش، بۆ پاراستنی خاك و خەڵكەكەمان گیانبازی گەورەیان كرد و خوێنی خۆیان كردە قوربانی".

بۆ پاراستنی ژیانی خەڵك، ژیانی خۆیان كردە قوربانی 

راشیگەیاند: "لە هەر قۆناغێكدا كە هەڕەشەی جددی لەسەر ژیانی خەڵك و خاكەكەمان دروست بووبێت، فەرماندەو تێكۆشەرەكانمان بۆ ئەمنییەتی زیاتر و دوورخستنەوەی مەترسییەكان لەسەر ژیانی خەڵك، ژیانی خۆیان دەكردە قوربانی و گیانبازی گەورەیان دەكرد".

شێركۆ میروەیس ئەوەشی راگەیاند: "لیوا حسێن مەنسوور بۆ پاراستنی كەركوك لەو سنوورە شەهید بوو و سەری رێز بۆ سەرجەم شەهیدانی كوردستان و ئەو شەهیدانە دادەنەوێنین كە بۆ پاراستنی خانەقین و خاكی كوردستان شەهید بوون".

هاوكات هەر لە مەراسیمەكەدا ئامادەبووان چەپكە گوڵی رێزو وەفایان لەسەر مەزاری شەهید لیوا حسێن مەنسوور داناو سۆزان مەنسوور وتەیەكی پێشكەشكرد و رایگەیاند: "لیوا حسێن مەنسوور بەتەنها كوڕی ئێمەو بنەماڵەكەی نەبوو، بەڵكو كوڕی هەمووتان بوو".

لیوا حسێن مەنسوور فەرماندەی هێزەكانی پشتیوانی دووی هێزی پێشمەرگەبوو و یەكێك بوو لە ئەفسەرە قارەمانەكانی دەستەی هێرش بردن بۆ سەر گوندی مەلا عەبدوڵڵا، بەڵام لە كۆنترۆڵكردنەوەی گوندی مەلا عەبدوڵڵا دا لە بەرەبەیانی رۆژی 31-1-2015 شەهیدبوو خوێنی خۆی بەخشییە ئازادی كوردستان.

PUKMEDIA