یەكێتی و پارتی لەسەر پرسی هەڵبژاردن و پارێزگاری كەركوك كۆدەبنەوە

PUKMEDIA

كۆبوونەوەی یەكێتی و پارتی لە دەباشان

کەمێکیتر بە ئامادەبوونی سەرۆک بافڵ جەلال تاڵەبانی لە دەباشان مەكتەبی سیاسی یەكێتی و پارتی لەسەر ئاستی باڵا لە سلێمانی كۆدەبنەوەو یەكێك لە تەوەرە سەرەكییەكانی كۆبوونەوەكەش پرسی پێكهێنانی ئەنجومەنی پارێزگاكانی كەركوك و نەینەوایە.

سەرچاوەیەك لەمەكتەبی سیاسی یەكێتی بە سایتی رەسمی یەكێتیی نیشتمانیی كوردستان PUKMEDIA ی راگەیاند: "لەكۆبوونەوەكەدا گفتوگۆی پێكهێنانی ئەنجومەنی پارێزگاكانی كەركوك و نەینەواو هەڵبژاردنی پەرلەمانی كوردستان دەكرێت".

پێشتر سەعدی ئەحمەد پیرە وتەبێژی یەكێتیی نیشتمانیی كوردستان بەسایتی رەسمی یەكێتی PUKMEDIA ی راگەیاندبوو: "دەستپێكردنەوەی كۆبوونەوەكانی یەكێتی و پارتی لەئێستادا زۆر گرنگە، بەتایبەت لەدوای ئاڵۆزبوونی دۆخی هەرێمی كوردستان و عیراق و ناوچەكە، بەتایبەتتریش لەدوای بەكارهێنانی درۆن و شەڕ‌‌وپێكدادان لەچەند پارێزگاو شوێنێكی هەرێم و هەوڵدان بۆ تێكدانی ئارامی و سنوور بەزاندنی خاكی هەرێم".

PUKMEDIA