‎ قوباد تاڵەبانی بەڵێنەكەی بۆ كەمئەندامان بەجێگەیاند

PUKMEDIA

پڕۆژەی نیشتەجێبوونی ژیانەوە

بۆ یەكەمجار لەسەر ئاستی هەرێمی كوردستان و عیراق بەبڕیاری قوباد تاڵەبانی جێگری سەرۆكوەزیرانی هەرێمی كوردستان، یەكەی نیشتەجێبوون بەنرخێكی كەم و قیستی درێژخایەن بەسەر كەمئەندامانی سنووری پارێزگای سلێمانیدا دابەشدەكرێن.

سامان حسێن سەرۆكی لقی سلێمانی یەكێتی كەمئەندامانی كوردستان بە سایتی رەسمی یەكێتیی نیشتمانیی كوردستان PUKMEDIA ی راگەیاند: "قوباد تاڵەبانی بەڵێنەكەی بۆ كەمئەندامان بەجێگەیاند و لە ئەمڕۆوە 4-2-2024 تاوەكو 22-2-2024، فۆڕمی یەكەی نیشتەجێبوون بەسەر كەمئەنداماندا لە بارەگای لقەكەمان دابەشدەكرێت".

"لە پڕۆژەی نیشتەجێبوونی ژیانەوەدا، 240 یەكەی نیشتەجێبوون بەپێشەكی 5 هەزار دۆلار و مانگانەی 150 هەزار دینار لە مووچەكەیان، بەسەر كەمئەنداماندا دابەشدەكرێت، كە لەمێژوویی هەرێمی كوردستان و عیراقدا بۆ یەكەمجارە كەمئەندامان خزمەتێكی لەو شێوەیەیان پێشكەش بكرێت" سامان حسێن وادەڵێت.

سەرۆكی لقی سلێمانی یەكێتی كەمئەندامانی كوردستان راشیگەیاند: "بەناوی كەمئەندامانی لقەكەمانەوە سوپاس و پێزانینی خۆمان ئاڕاستەی قوباد تاڵەبانی جێگری سەرۆكی ئەنجومەنی وەزیرانی هەرێم دەكەین، كە هەمیشە كەمئەندامانی لەبیر بووەو خزمەتی كردوون".

پڕۆژەی نیشتەجێبوونی ژیانەوە كە لە 1000 یەكەی نیشتەجێبوون پێكهاتووە و بەبڕیاری قوباد تاڵەبانی 240 یەكەی نیشتەجێبوونی بۆ كەمئەندامان تەرخانكراوە، پڕۆژەكە دەكەوێتە سەر شاڕێی قولەرەیسی و تا ئێستا دوو تاوەریان تەواو بوون، كەمئەندامان دەتوانن رۆژانە سەعات 9 بۆ  4ی پاشنیوەڕۆ سەردانی بارگای یەكێتی كەمئەندامان لە زێڕینۆك بكەن.

PUKMEDIA