پلاسخارت باسی موچە و پەرلەمان و هێرشەکانی هەرێم دەکات

ئەرشیف

جێنین پلاسخارت نوێنەری سکرتێری گشتیی نەتەوەیەکگرتووەکان لە عیراق

جێنین پلاسخارت نوێنەری سکرتێری گشتیی نەتەوەیەکگرتووەکان لە عیراق لە وتارێکیدا لە ئەنجومەنی ئاسایش باسی مووچە و پەرلەمان و هێرشەکانی سەرهەرێمی کوردستانی کرد و رایگەیاند: "تائێستا دووجار هەڵبژاردنی پەرلەمان لە هەرێمی كوردستان دواخراوە، کە ئەوەش  خزمەت بە سەقامگیری عێراق و هەرێم ناکات". 

پلاسخارت باسی لە سێ رووداوی هەرێم کرد

پلاسخارت کە ماوەی 5 ساڵە لە عیراق وەک نوێنەری سکرتێری گشتی نەتەوەیەکگرتووەکان لە عیراق کاردەکات، لەو وتارەیەیدا کە ئێوارەی 6ی2ی2024 لەئەنجومەنی ئاسایش پێشکەشی کرد،"داوای بەخشینی لەئەرکەکەی کرد" کە ئەوەش کۆتا وتاری دەبێت و واز دەهێنێت. پلاسخارت لەو راپۆرتەدا کە لەسەر عیراق پێشکەشی کرد باسی لە سێ رووداوی هەرێم کرد و یەکێکیان پرسی بودجە و مووچەیە، کە ئەوەش دووەمجارە پرسی مووچە لەزاری پلاسخارتەوە بەگوێی ئەنجومەنەکەدا دەدرێت. 

پلاسخارت لەوبارەیەوە رایگەیاند: "پێویستە بودجە و پارە بۆ هەرێمی کوردستان بنێردرێت، تاوەکو مانگانە مووچەی فەرمانبەرانی دابەش بکات". "تا ئێستا دووجار هەڵبژاردنی پەرلەمان لە هەرێمی كوردستان دواخراوە، دواخستنی هەڵبژاردنی پەرلەمانی كوردستان لە خزمەتی سەقامگیری عێراق و هەرێمی کوردستاندا نیە". 

سەبارەت بەرووداوی هێرشەکانی سەر هەرێمی کوردستانەوە پلاسخارت وتیشی: "هێرشەكانی توركیا بۆسەر هەرێمی كوردستان بووەتە رووداوێكی هەفتانەو دووبارە دەبێتـەوە". 

پلاسخارت: دۆخی عیراق خەریکە لەدەست دەردەچێت

جێنین پلاسخارت نوێنەری سکرتێری گشتیی نەتەوەیەکگرتووەکان لە عیراق ئاماژەی بەوەشدا: "خەریکە دۆخی عیراق لە دەست دەردەچێت و گروپی چەکداری زۆر لە عێراق هەن کە بەشێکیان لەدەرەوەی دەسەڵاتەکانی سەرۆک وەزیرانی عێراقە، ئاسمانی عێراق دەبەزێندرێت، دۆخەکە لەناوخۆ و دەرەوەی عێراق خراپە خەریکە لەدەست دەردەچێت".

"ھێرشە بەردەوامەکانی میلیشیاکان لە ناوچەکە دۆخێکی ناخۆشی دروستکردووە، دەشڵێت: شۆک بوین بە ھێرشە موشەکییەکەی ئێران بۆ سەر ھەولێر"، پلاسخارت وای وت.

نوێنەری عیراق: ھاوئاھەنگی بەردەوام لەنێوان ھەرێم و بەغدا ھەیە

هەر لە کۆبوونەوەی ئەنجومەنی ئاسایش عەباس کازم نوێنەری عیراق لە نەتەوەیەکگرتووەکان لەدوای راپۆرتەکەی پلاسخارت، باسی لە دۆخی عیراق کرد ولەبارەی پرسی بودجە و مووچەی هەرێم، رایگەیاند:"ھاوئاھەنگی بەردەوام لەنێوان ھەرێم و بەغدا دا ھەیە بۆ چارەسەری کێشەکان و نزیکن لە رێککەوتن لەسەر بودجە، ھەروەھا کاردەکەن لەسەر دەستپێکردنەوەی ھەناردەی نەوتی ھەرێم لە رێگەی تورکیاوە". 

"ھێرشکردنە سەر خاک و سەروەری عێراق لەلایەن ھەر لایەنێکەوە بێت رەتیدەکەنەوە و عێراق رێگە بەھیچ لایەنێک نادات ئاسایش و سەقامگیریی بخاتە مەترسییەوە" عەباس کازم وایوت.

PUKMEDIA