هێزە ئەمنییەکانی دهۆک رۆژنامەنووس ئومێد بەرۆشکی دەستگیردەکەنەوە

ئەرشیف

رۆژنامەنووس ئومێد بەرۆشکی

رۆژنامەنووس ئومێد بەرۆشکی جارێکی دیکە لەلایەن هێزە ئەمنییەکانی پارێزگای دهۆکەوە دەستگیرکرایەوە، ئەمەش لەکاتێکدایە بەپێی راپۆرتی ساڵانەی رێکخراوی پەیامنێران بۆ ماف و گەشەپێدان:" لەساڵی رابردوودا زۆرترین پێشێلکاری کە بەرامبەر بە رۆژنامەنووسان کراون لە پارێزگاکانی هەولێر و دهۆک بوون، کە دەستگیرکردنی رۆژنامەنووسان بووە".

دەستگیرکردنی رۆژنامەنووسان لەدهۆک زەنگێکی مەترسیدارە

رێکخراوی پەیامنێران لەراگەیەنراوێکدا ئیدانەی دەستگیرکردنی رۆژنامەنووس ئومێد بەرۆشکی دەکات و ئاماژە بەوەدەکات:" دەستگیرکردنی رۆژنامەنووسان و هەڵکوتانە سەریان لەپارێزگای دهۆک زەنگێکی مەترسیدارە و پێمان دەڵێت گیان و ژیانی رۆژنامەنووسان پارێزراو نییە و بەهیچ شێوەیەک لەگەڵ بنەماکانی ئازادی کاری رۆژنامەنووسی یەکناگرێتەوە".

هەر لەراگەیەنراوەکەدا هاتووە:" داوا لە هێزە ئەمنییەکان دەکەین ، دەستگیرکردنی رۆژنامەنووسان بەبێ مۆڵەتی دادوەر بوەستێنن".

زۆرترین پێشێلکاری لە هەولێر و دهۆک بوون

لەو پێشێلكارییانەی بەرامبەر بە رۆژنامەنووسان و كەناڵ و دەزگاكانی راگەیاندن کراون، پارێزگای هەولێر پلەی یەكەمی بە 78 حاڵەت وەرگرتووە، پاشانیش پارێزگای دهۆك دێت كە 37 پێشێلكاری تێدا ئەنجامدراوە، هاوكات كەمترین پێشێلكاری لە پارێزگاكانی هەڵەبجە و سلێمانییە، كە بە هەردوو پارێزگاكە تەنها 21 حاڵەت تۆمار كراوە.

پێشتر هۆزان قادر سەرۆكی رێكخراوی پەیامنێران بۆ ماف و گەشەپێدانی رۆژنامەنووسان لەبارەی پێشێلکارییەکان بەرامبەر بە رۆژنامەنووسان لەساڵی رابردوودا، بە سایتی رەسمی یەكێتیی نیشتمانیی كوردستان PUKMEDIA ی راگەیاندبوو: "لەكۆی 136 پێشێلكاری كە بەرامبەر بە رۆژنامەنووسان كراوە، زۆرترین پێشێلكاری لە پارێزگای هەولێر بووە كە 78 پێشێلكارییە، هەروەها پارێزگای دهۆك بە پلەی دووەم دێت كە 37 پێشێلكاری تێدا ئەنجامدراوە، هەر بەپێی ئامارەكان، پارێزگای هەڵەبجە كەمترین پێشێلكاری بەرامبەر بە رۆژنامەنووسان تێدا ئەنجامدراوە كە 10 پێشێلكاری بووە، هاوكات پارێزگای سلێمانی لەدوای هەڵەبجە بەپلەی دووەم دێت كە كەمترین پێشێلكاری رۆژنامەنوسانی تێدا ئەنجامدراوە كە  11  حاڵەت بووە".

بەپێی زانیارییەکانی PUKMEDIA بەیانی ئەمڕۆ پێنجشەممە ٢٢-٢-٢٠٢٤هێزێکی ئەمنی هەڵیانکوتایە سەر ماڵی رۆژنامەنووس (ئومێد بەرۆشکی) خاوەنی دەزگایی (ڕاست میدیا ) لەشاری دهۆک و دەستگيرییانکرد".

PUKMEDIA