سەرۆكکۆمار گەیشتە جەزائیر

نوسینگەی راگەیاندنی سەرۆکایەتی کۆمار

سەرۆککۆماری عیراق و سەرۆکی جەزائیر

د.لەتیف جەمال رەشید سەرۆكکۆماری عیراق، ئەمڕۆ هەینی 1-3-2024، بەمەبەستی بەشداریکردن لە کۆڕبەندی وڵاتانی هەناردەکاری غاز گەیشتە جەزائیر.

لەگەڵ گەیشتنی بە فڕۆکەخانەی هەواری بومدیان، سەرۆكکۆمار لەلایەن عەبدولمەجید تەبون سەرۆکی جەزائیرەوە بە مەراسیمێکی رەسمی پێشوازی لێکرا، کە تێیدا سرودی نیشتمانیی عیراق و جەزائیر لێدران و دواتر پاسەوانی شەرەفیان پشکنی.

سەردانەکەی سەرۆك کۆمار لە وەڵامی بانگهێشتێکی رەسمیی عەبدولمەجید تەبون سەرۆکی جەزائیر دێت بۆ بەشداریکردن لە حەوتەمین لوتکەی سەرۆکی دەوڵەت و حکومەتەکان لە کۆڕبەندی وڵاتانی هەناردەکاری غاز (GECF).

لەو سەردانەدا، وەفدێکی حکومی یاوەریی سەرۆك کۆمار دەکات، کە پێکهاتوە لە د.حەیان عەبدولغەنی جێگری سەرۆکی ئەنجومەنی وەزیران و وەزیری نەوت، عەدنان عاشور عەدنان ئەندامی لیژنەی وزە لە ئەنجومەنی نوێنەران، د.عەلی شوکری سەرۆکی دەستەی راوێژکاران و شارەزایان لە سەرۆکایەتی کۆمار، د.محەمەد حسێن بەحرلعلوم بریکاری  وەزارەتی دەرەوە، فارس عیسا سەرۆکی نوێنەرایەتی هەرێمی کوردستان لە بەغداد و ژمارەیەک لێپرسراو و راوێژکار.
PUKMEDIA