كۆمسیۆن دەرگای هاوپەیمانی لە بەردەم حزبە كوردستانییەكان دەكاتەوە

PUKMEDIA

پەرلەمانی كوردستان، لۆگۆی كۆمسیۆنی هەڵبژاردنەكانی عیراق

كۆمسیۆنی هەڵبژاردنەكانی عیراق دوو رۆژی دیكە 5-3-2024، دەرگای پێكهێنانی هاوپەیمانی سیاسی بۆ حزبە كوردستانییەكان دەكاتەوە و تا رۆژی 14-3-2024، بەردەوام دەبێت، ئەمە لە كاتێكدایە كە سەرۆكی هەرێمی كوردستان 10-6-2024 ی وەك وادەیەكی نوێ بۆ هەڵبژاردنی خولی شەشەمی پەرلەمانی كوردستان دیاریكرد.

بەپێی راگەیەندراوێك كە كۆمسیۆنی باڵای سەربەخۆی هەڵبژاردنەكانی عیراق بڵاویكردەوە و كۆپیەكی بۆ PUKMEDIA نێردراوە، حزبە سیاسییە كوردستانیەكان لە وادەی پێكهێنانی هاوپەیمانی ئاگادار دەكاتەوە بۆ هەڵبژاردنی پەرلەمانی كوردستان كە نزیكەی 9 رۆژیان لە بەردەمدا دەبێت و ئاماژە بەوەش دەكات: "دەرگای هاوپەیمان بۆ ئەو حزبە سیاسییە كوردستانیانەی چالاكییەكانیان لە هەرێمی كوردستانە دەكاتەوە كە ئارەزوی بەشداریكردنیان لە هەڵبژاردنی خولی شەشەمی پەرلەمانی كوردستاندا هەیە". 

بە گوێرەی راگەیەندراوەكە دەرگای پێكهێنانی هاوپەیمانی سیاسی لە رۆژی 5/3 دەستپێدەكات، تا رۆژی 14/3 بەردەوام دەبێت و دەرفەتی درێژكردنەوەی نییە، هاوكات حزبە كوردستانییەكان دەتوانن لەڕێگەی نووسینگەكانی لقی كۆمسیۆنی باڵای سەربەخۆی هەڵبژاردنەكانی عیراقەوە لە پارێزگاكانی هەرێمی كوردستان هاوپەیمانێتییەكانیان تۆمار بكەن.

PUKMEDIA