کۆسرەت رەسوڵ عەلی: هێزو لایەنە سیاسییەکان ململانێکانیان وەلا بنێن

PUKMEDIA

کۆسرەت رەسوڵ عەلی

کۆسرەت رەسوڵ عەلی ٣٣ هەمین ساڵیادی راپەڕینی خەڵکی کوردستان پەیامێکی بڵاوکردەوە و رایگەیاند:"ئاواتەخوازم هێز و لایەنە سیاسییەکان ململانێکانیان وەلا بنێن و خەبات بکەن بۆ خزمەتکردنی کۆمەڵانی خەڵکی کوردستان و چارەسەرکردنی ریشەیی کێشەکان، ئەوەی هەمانە  بەری رەنج و قوربانیدانی هەزاران شەهیدو تێکۆشەرە، پاراستنی واجبێکی پیرۆزە".

(٣٣)هەمین ساڵیادی راپەڕینی خەڵکی کوردستان لە پێشمەرگە قارەمانەکان و کەسوکاری سەربەرزی شەهیدان، رێکخستنە نهێنییەکانی ناوشار، شانە چەکدارەکان و تەواوی خەڵکی کوردستان پیرۆز دەکەم، ئومێد دەکەم ئەم یادە هەوێنی تەبایی و یەکڕیزی نێوان سەرجەم هێزو لایەنە سیاسییەکان بێت.

٣٣ ساڵ لەمەوبەر، هێزی پێشمەرگەی کوردستان بەهاوکاری رێکخستنەکانی ناو شارو شانە چەکدارەکان و بە بەشداری راستەوخۆی جەماوەری راپەڕیو توانی بەرەنگاری دڕندەترین رژێم بێتەوە و لە کوردستان وەدەری بنێت و خاکی پیرۆزی کوردستان لە خانەقین تا زاخۆ رزگار بکات.

ئەمڕۆ کە یادی ئەم رۆژە مێژووییە دەکەینەوەو کوردستان بە دۆخێکی یەکجار هەستیارو مەترسیدار تێپەڕ دەبێت، پێویستمانە بە هەمان رۆحیەتی رۆژانی راپەڕین دەست لەناو دەست بەتەبایی و یەکڕیزی لەپێناو یەکگرتوویی و کوردو ئامانجە وەدینەهاتووەکانمان خەبات بکەین و داکۆکی لە گەلی خۆمان بکەین، ئاواتەخوازم هێزو لایەنە سیاسییەکان ململانێکانیان وەلا بنێن و خەبات بکەن بۆ خزمەتکردنی کۆمەڵانی خەڵکی کوردستان و چارەسەرکردنی ریشەیی کێشەکان، ئەوەی هەمانە  بەری رەنج و قوربانیدانی هەزاران شەهیدو تێکۆشەرە، پاراستنی واجبێکی پیرۆزە.

دووبارە ساڵیادی راپەڕین لە هەموو گەلی کوردستان پیرۆز دەکەم و سەری رێزو نەوازش بۆ شەهیدان دادەنوێنین.

کۆسرەت رەسوڵ عەلی

PUKMEDIA