خانمی یەکەم: ژنانی عیراق بڕبڕەى پشتی کۆمەڵگەن

نوسینگەی رۆژنامەوانی خانمی یەکەمی عیراق

شاناز ئیبراهیم ئەحمەد خانمی یەکەمی عیراق

شاناز ئیبراهیم ئەحمەد خانمی یەکەمی عیراق ، ئامادەی ئاهەنگی تایبەت بەرۆژى جیهانیی ژنان بوو، کە زانکۆى ئەمریکی لە بەغدا رێکیخستبوو. 

خانمی یەکەم وتەیەکی لەئاهەنگەکەدا پێشکەشکرد و جەختیکردەوە، عیراق پێش هەشتی ئازاریش کەوتووە لەکارکردن بۆ چالاککردنی ژنان، مێژوویەکی درێژ و گرنگیشی هەیە لەمبارەیەوە. ئاماژەى بەوەشکرد، چالاکبونی ژنان و یەکسانی نێوان هەردوو رەگەز تەنیا چەمک و دروشمی سەپێنراو نییە بەسەر کۆمەڵگەی عێراقیماندا، بەڵکو لەسەرەتاى سەدەى بیستەمەوە، ژنانی پێشەنگ خەباتیان کرد لەپێناو بەدەستهێنانی مافەکانیان لەخوێندن و کارکردن و بەشداریکردن و دەنگدان لەهەڵبژاردندا. 

هەروەها خاتوو شاناز ئیبراهیم ئەحمەد ئاماژەى بەوەکرد، کە ژنانی عێراق خەباتیان کردووە و پەنایانبردۆتەبەر تێکۆشانی چەکداریی شان بەشانی پیاوان بۆ روبەڕوبونەوەى سەرکوتکردن و ستەمکارى و بەدەستهێنانی ماف و پێگە کۆمەڵایەتییەکانیان.

خانمی یەکەم روونیشیکردەوە، سەربارى ئاستەنگ و شکستە گەورەکانی رابردوو لەنێویاندا هێرشی تۆڕى تێرۆریستیی داعش و تێکشکانی و جەنگە یەک لەدواى یەکەکان کەژمارەیەکی بێشوومارى لەبێوەژنانی جێهێشت لەم وڵاتەدا، لەگەڵ ژمارەیەکی بێشوومار لەو دایکانەى کەبەرگەى ئازارى لەدەستدانى کوڕ و کچەکانیان گرت لەدەرەنجامی ئەو تاوانە دڕندانانەی کە بەرۆکی مرۆڤایەتی گرتەوە، ژنانی عێراق بەبەردەوامیی رۆڵێکی یەکلاکەرەوەیان بینی لەبنیاتنانی ئاشتی دا، ژنان وەک بڕبڕەى پشتی کۆمەڵگەى عێراقی بوون، ئاماژەشى بەقوربانیدانی ژنانی عێراق و روبەڕوبوونەوەکانیان کرد بەهەموو توانایەکیانەوە بۆ بارودۆخ و بارگرانییەکان و دڵسۆزییان بۆ خزمەتکردنی وڵاتەکەیان. 

خاتوو شاناز ئیبراهیم ئەحمەد هەر بەم بۆنەیەوە سڵاوی لەژنانی کوردستان کرد بۆ ئەو قوربانیدانە گەورانەى داویانە بەتایبەت کە ئەم رۆژانە ساڵیادی راپەڕینی کوردستانە دژى ستەم و دڕندەیەتی، هاوکات سڵاوی لەژنانی غەززە کرد بۆ ئازایەتی و خۆڕاگری و بەرگەگرتنی نەهامەتی لەدەرەنجامی دوژمنکاریی.

PUKMEDIA