‎لەتیف نێروەیی: یەكێتی لەگەڵ دابەشكردنی مووچەی فەرمانبەراندایە

PUKMEDIA

‎لەتیف نێروەیی

زیاتر لە چوار رۆژە وەزارەتی دارایی عیراق پارەی مووچەی رەوانەی هەرێم كردووە بەڵام حكومەتی هەرێم دەستبەدابەشكردنی مووچە ناكات، ئەندامی سەركردایەتی یەكێتیش رایدەگەیەنێت: "یەكێتی لەگەڵ دابەشكردنی مووچەی فەرمانبەراندایەو پێشتریش لەسەر زاری وتەبێژی یەكێتییەوە ئەوەمان راگەیاندووە".

لەتیف نێروەیی ئەندامی سەركردایەتی و لێپرسراوی بۆردی راگەیاندنی یەكێتیی نیشتمانیی كوردستان رایدەگەیەنێت: "سەبارەت بە كێشەی مووچەی فەرمانبەرانی هەرێم، ژمارەیەكی زۆر پرسیار لەسەر ئەو بابەتە دەكرێت، لەكاتێكدا یەكێتی لەگەڵ دابەشكردنی مووچەی فەرمانبەراندایە".

قوباد تاڵەبانی بەشداریی كۆبوونەوەكەی ئەنجومەنی وەزیران نەبووە

راشیدەگەیەنێت: "قوباد تاڵەبانی جێگری سەرۆك وەزیرانی هەرێم بەشداری لە كۆبوونەوەكەی رۆژی 13-3-2024 ی ئەنجومەنی وەزیراندا نەكردووەو وەزیرەكانی دیكەی یەكێتیی نیشتمانیی كوردستانیش لەگەڵ دابەشكردنی موچەدابوون".

لەتیف نێروەیی دەشڵێت: "سەعدی ئەحمەد پیرە وتەبێژی یەكێتی بەناوی یەكێتییەوە رایگەیاندووە، كە ئێمە لەگەڵ دابەشكرنی موچەداین نەك دابەشنەكردنی".

ئەمەش لەكاتێكدایە رۆژی 11ی ئادار، وەزارەتی دارایی عیراق پارەی مووچەی مانگی شوباتی هەرێمی كوردستانی  بۆ ئەو توێژانە نارد كە لیستی مووچەیان رەوانەی بەغدا كردبوو، كە بڕی 560 ملیار و 218 ملیۆن و 37 هەزار و 912 دینارە، بەڵام تاوەكو ئێستا حكومەتی هەرێم هیچ وادەیەكی بۆ دابەشكردنی مووچە رانەگەیاندووە.

PUKMEDIA