فراكسیۆنی یەكێتی داوای راگرتنی تەلبەندكردنی سنووری نێوان عیراق و ئێران دەكات

ئەرشیف

بەشێک لە فراکسیۆنی یەکێتی و سەرۆکوەزیرانی عیراق

یەكێتی زیادەڕەواییەكانی تەلبەندكردنی سنووری نێوان عیراق و ئێران دەگەیەنێتە سەرۆكوەزیرانی عیراق و داوای راگرتنی ئەكات، بڕیاردەری فراكسیۆنی یەكێتیش دەڵێت: "وەزیری ناوخۆی عیراق لیژنەیەكی هاوبەش بۆ چارەسەركردنی كێشەكە ئەنێرێتە ناوچەكە".

كاروان یاروەیس بڕیاردەری فراكسیۆنی یەكێتی لە ئەنجومەنی نوێنەرانی عیراق بە وێبسایتی رەسمی یەكێتیی نیشتمانیی كوردستان PUKMEDIA ی رایگەیاند: "وەك فراكسیۆنی یەكێتی داوامان لە محەمەد شیاع سودانی سەرۆكوەزیرانی عیراق كردووە لیژنەیەكی هاوبەش پێكبهێنرێت و ئەو زیادەڕەواییانەی بەهۆی تەلبەندكردنی شریتی سنووری نێوان عیراق و ئێران بەگرنگ وەربگرێت".

"پێشتر لەرێگای خالد شوانی وەزیری دادی عیراقەوە یاداشتێكی دیكە لەوبارەیەوە دراوەتە سەرۆكوەزیران و ئەویش وەزیری ناوخۆی راسپاردووە پێداچوونەوە بە پڕۆژەكەدا بكەن و كێشەكان چارەسەربكەن، وەزیری ناوخۆی عیراقیش بە خالد شوانی وەزیری دادی راگەیاندووە لیژنەیەكی هاوبەش ئەنێرنە ناوچەكە بۆ چارەسەركردنی كێشەكە" كاروان یاروەیس وادەڵێت.

راشیگەیاند: "رووبەرێكی زۆر زەوی كشتوكاڵ و لەوەڕگە ئەكەونە پشتەوەی تەلبەندەكە و هەرچی ئاسك و ئاژەڵی كێوی هەیە بەهۆی تەلبەندەكەوە ناتوانن هاتوچۆ بكەن و لەهاویندا لەناودەچن، لەكاتێكدا بەڵیندەرەكە كێشەی نییەو دەیەوێت زوو كارەكەی تەواو بكات و پارەی خۆی لە فەرماندەیی گشتی پاسەوانی سنوور وەربگرێت و فەرماندەیی گشتیش هاوكاریانن و جۆرێكە لە پارە سپیی كردنەوە، هەربۆیە خەڵك و گوندنیشنانی ناوچەكە دڵسۆزانە بەرگری لەخاكی خۆیان دەكەن و ئێمەیش چۆن لەسەرەتاوە درێغیمان نەكردووە ئاوا بەردەوام دەبین".

PUKMEDIA