وه‌زیری خوێندنی باڵا: له‌گه‌ڵ دابه‌شكردنی مووچه‌ین

PUKMEDIA

دكتۆر ئارام محه‌مه‌د قادر وه‌زیری خوێندنی باڵاو توێژینه‌وه‌ی زانستی حكومه‌تی هه‌رێمی كوردستان

وه‌زیری خوێندنی باڵای حكومه‌تی هه‌رێمی كوردستان له‌لێدوانێكی رۆژنامه‌وانیدا ئه‌و تۆمه‌تانه‌ی ره‌تكرده‌وه‌ كه‌ گوایه‌ وه‌زیره‌كانی یه‌كێتی ده‌نگیان دابێت به‌ دابه‌شنه‌كردنی مووچه‌ی فه‌رمانبه‌رانی هه‌رێم.

دكتۆر ئارام محه‌مه‌د قادر وه‌زیری خوێندنی باڵاو توێژینه‌وه‌ی زانستی حكومه‌تی هه‌رێمی كوردستان له‌سه‌ر ئه‌و تۆمه‌تانه‌ی كه‌ ئاڕاسته‌ی وه‌زیره‌كانی پشكی یه‌كێتی ده‌كرێن، رایگه‌یاند:"له‌كۆبوونه‌وه‌ی ئه‌نجومه‌نی وه‌زیراندا به‌هیچ شێوه‌یەك ده‌نگمان نه‌داوه‌ به‌ دابه‌شنه‌كردنی مووچه‌ی فه‌رمانبه‌ران و ئه‌سله‌ن ئه‌و بابه‌ته‌ نه‌خراوه‌ته‌ ده‌نگدانه‌وه‌".

"ئێمه‌ له‌گه‌ڵ ئه‌وه‌داین مووچه‌خۆرانی هه‌رێمی كوردستان مووچه‌ی خۆیان وه‌ربگرن، به‌ڵام ورده‌كاری ته‌كنیكی مووچه‌ی فه‌رمانبه‌ران زیاتر له‌لای وه‌زاره‌تی داراییه‌و هه‌وڵه‌كانیش به‌رده‌وامن بۆ چاره‌سه‌ركردنی ئه‌و كێشه‌یه‌"، د.ئارام محه‌مه‌د وایوت.

 ئه‌م هه‌ڵوێسته‌ی وه‌زیری خوێندنی باڵا، له‌كاتێكدایه‌ كه‌ هه‌ندێك سه‌رچاوه‌ی میدیایی وه‌كو بانگه‌شه‌ی پێشوه‌خته‌ی هه‌ڵبژاردن ده‌ستیانكردووه‌ به‌ هۆنینه‌وه‌ی سیناریۆی چه‌واشه‌كارانه‌ و هێرشی میدیاییان له‌دژی یه‌كێتی ده‌ستپێكرد، یه‌كه‌مجار وێنه‌ی هه‌ڤاڵ قوباد تاڵه‌بانی جێگری سه‌رۆكی ئه‌نجومه‌نی وه‌زیرانیان خسته‌ سه‌رشاشه‌ی ته‌له‌فزیۆنی خۆیان و رایانگه‌یاند:" یه‌كێتی له‌رێی قوباد تاڵه‌بانییه‌وه‌ بڕیاریداوه‌ مووچه‌ی فه‌رمانبه‌رانی هه‌رێم دابه‌شنه‌كرێت ،پاشان كاتێك زانیان كه‌ قوباد تاڵه‌بانی جێگری سه‌رۆكوه‌زیران به‌شداری كۆبوونه‌وه‌كه‌ی ئه‌نجومه‌نی وه‌زیرانی نه‌كردووه‌، بۆ داپۆشینی شه‌رمه‌زارییه‌كه‌ی خۆیان به‌په‌له‌ وێنه‌ی وه‌زیرانی یه‌كێتییان خسته‌ شوێنی وێنه‌ی هه‌ڤاڵ قوباد تاڵه‌بانی و رایانگه‌یاند: وه‌زیره‌كانی یه‌كێتیش ده‌نگیانداوه‌ به‌دابه‌شنه‌كردنی موچه‌.

هه‌رچه‌نده‌ جه‌ماوه‌ری كوردستان و به‌رپرسه‌ حزبی و حكومییه‌كانی عیراق باش ئه‌و راستییه‌ ده‌زانن كه‌ هیچ لایه‌نێكی سیاسی كوردستانی هێندەی یه‌كێتیی نیشتمانیی كوردستان جددی و مه‌یدانی نه‌بووه‌ بۆ چاره‌سه‌ركردنی كێشه‌ی موچه‌ی فه‌رمانبه‌ران و سه‌رۆكی هیچ حزبێكی كوردستانیش وەک سه‌رۆكی یه‌كێتی سه‌ردانی به‌غدای نه‌كردووه‌ بۆ چاره‌سه‌ركردنی كێشه‌ی مووچه‌ی فه‌رمانبه‌رانی هه‌رێم و ئه‌نجامدانی كۆبوونه‌وه‌ له‌گه‌ڵ سه‌ركرده‌كانی عیراق، بۆیه‌ هیچ كه‌سێك بڕوا به‌وانه‌ ناكات كه‌ خه‌ونی به‌ده‌ستهێنانی ده‌نگ له‌سه‌ر بنه‌مای بڵاوكردنه‌وه‌ی هه‌واڵی چه‌واشه‌كارییانه‌بێت، به‌ڵام لێدوانی وه‌زیری خوێندنی باڵا وه‌ڵامێكی به‌جێیه‌و په‌یامێكه‌ پێیان ده‌ڵێت:"په‌تی درو زۆركورته‌ .

PUKMEDIA