سەرۆككۆمار: كێشەكانی نێوان هەرێم و بەغدا بەدیالۆگ چارەسەربكرێن

نووسینگەی سەرۆككۆماری عیراق

سەرۆكکۆمار پێشوازی لە سەرۆك و ئەندامانی دادگای باڵای فیدراڵی دەکات

د.لەتیف جەمال رەشید سەرۆككۆماری عیراق رۆژی 24-3-2024 لە بەغدا پێشوازی لە دادوەر جاسم محەمەد عەبود سەرۆكی دادگای باڵای فیدراڵی و ژمارەیەك لە دادوەرانی ئەندامانی دادگاكە كرد.

لە سەرەتای دیدارەكەدا سەرۆككۆمار و سەرۆك و ئەندامانی دادگای باڵای فیدراڵی پیرۆزبایی مانگی رەمەزانیان ئاڵوگۆڕكرد و ئومێدیان خواست عیراق و عیراقییەكان هەمیشە لە ئاسایش و ئارامی و سەقامگیریدا بژین. 

سەرۆككۆمار جەختی لەوە كردەوە، ئەو ئاسایش و سەقامگیرییەی وڵات بەخۆوەی دەبینێت، دەستكەوتێكی گرنگ و شایستەیەو دەبێت پارێزگاری لێبكرێت و بچەسپێنرێت وەك بنەمایەك بۆ دەستپێكردن و گەیشتن بە گەشەپێدانی ئابوری، پێشخستنی وەبەرهێنان و بەرزكردنەوەی ئاستی بژێوی و خزمەتگوزاری بۆ هاووڵاتیان.

هەروەها سەرۆككۆمار ئاماژەی بەوەشكرد، دەبێت دامودەزگاكانی دەوڵەت رۆڵ و هەوڵەكانیان بۆ خزمەتكردنی هاووڵاتیان پاڵپشت به یاساو دەستور، پتەوتر بكەن. باسی لەوەشكرد، دەبێت دیالۆگی دیموكراسی رێگەی چارەسەركردنی ئەو كێشانه بێت، كه روبەڕوی پەیوەندییەكانی نێوان حكومەتی فیدراڵی و هەرێمی كوردستان و پارێزگاكان دەبێتەوه، هەروەك دەبێت یاسا رێكخەری ئەو پەیوەندییە بێت.

لەلایەن خۆیەوە دادوەر جاسم محەمەد عەبود سەرۆكی دادگای باڵای فیدراڵی جەختیكردەوە، دادگای فیدراڵی بە یەك دووری لەگەڵ هەمووان دەوەستێت و پەرۆشی كاركردنە بە دەستور و یاساو پرسی ئەنجامدانی هەڵبژاردن و ناردنی موچەی فەرمانبەرانی هەرێمی كوردستان لە كارە لەپێشینەكانی دادگاكەیە جەختیشیكردەوە، دادگای باڵای فیدراڵی ئامادەیە بۆ كاركردن لەگەڵ سەرجەم لایەنە پەیوەندیدارەكان بۆ بەئەنجامگەیاندنی ئەو مافانە لەژێر سایەی دەستوردا.

PUKMEDIA