وتەبێژی کۆمسیۆن: وادەى پێشکەشکردنى ناوى کاندیدان درێژکرایەوە

PUKMEDIA

جومانە غەلای وتەبێژی کۆمسیۆنی باڵای سەربەخۆی هەڵبژاردنەکانی عیراق

لەگەڵ ئەوەی بڕیاربوو کۆتایی دەوامی رەسمیی ئەمڕۆ ٣١-٣-٢٠٢٤ وادەی پێشکەشکردنی ناوی کاندیدی حزب و لایەنەکان بە کۆمسیۆن کۆتایی بێت، بەڵام وادەکە بۆ ماوەی ٩ سەعات درێژکرایەوە.

جومانە غەلای وتەبێژی کۆمسیۆنی باڵای سەربەخۆی هەڵبژاردنەکانی عیراق بە وێبسایتی رەسمیی یەکێتیی نیشتمانیی کوردستان PUKMEDIA ی راگەیاند:" لەگەڵ ئەوەی بڕیاربوو کۆتایی دەوامیی رەسمیی ئەمڕۆ وادەی پێشکەشکردنی ناوی کاندیدەکان لەلایەن حزب و لایەنەکانەوە کۆتایی بێت، بەڵام وادەکە بۆ ماوەی ٩ سەعات درێژکرایەوە".

"حزب و لایەنەکان دەتوانن تا سەعات ١٢:٠٠ی ئەمشەو ناوی کاندیدەکانیان بۆ لقی کۆمسیۆنی پارێزگاکانیان بنێرن و هیچ بڕیارێکیش نییە بۆ جارێکی تر درێژکردنەوەی ئەو وادەیە".

ئەمەش لەکاتێکدایە کۆمسیۆنی باڵای سەربەخۆی هەڵبژاردنەکانی عیراق بۆ سێهەم جارە وادەی پێشکەشکردنی ناوی کاندیدەکان درێژ دەکاتەوە، کە پێشتریش بڕیاربوو لە ٢٨-٣ وادەی پێشکەشکردنەکە کۆتایی بێت، بەڵام جارێکی تر وادەکەی بۆ ماوەی سێ رۆژی دیکە درێژکردەوە و بڕیاریدا لەگەڵ کۆتایی هاتنی دەوامی رۆژی ٣١-٣ وادەی پێشکەشکردنەکە کۆتایی بێت، بەڵام دوای پێشکەشکردنەکان بۆ جاری سێهەم وادەکەی بۆ سەعات ١٢:٠٠ی ئەمشەو درێژکردەوە.

PUKMEDIA