کۆمسیۆن ژمارە بە لیست و کاندیدەکانی هەڵبژاردن دەدات

PUKMEDIA

پەرلەمانی کوردستان

وادەی ناو تۆمارکردنی کاندیدی حزب و لایەنەکان کۆتاییهات  و 10 حزب و دوو هاوپەیمانێتی ناوی کاندیدەکانیان پێشکەش بە کۆمسیۆن کردووە، ئەمە جگە لەوەی 54 کاندیدی سەربەخۆش ناوی خۆیان تۆمارکردووە، هەفتەی داهاتووش ژمارە بە لیست و کاندیدەکانی هەڵبژاردنی پەرلەمانی کوردستان دەدرێت.

جومانە غەلای وتەبێژی کۆمسیۆنی باڵای سەربەخۆی هەڵبژاردنەکانی عیراق بە وێبسایتی رەسمیی یەکێتیی نیشتمانیی کوردستان PUKMEDIA ی راگەیاند:"سەعات 12ی شەوی رابردوو وادەی ناو تۆمارکردنی کاندیدی حزب و لایەن و کاندیدە سەربەخۆکان کۆتایی هات و دوو هاوپەیمانێتی و 10 حزب و 54 کاندیدی سەربەخۆ ناویان تۆمار کردووە".

"بڕیارە رۆژی 6-4-2024 بە هەڵبژاردن ژمارە بە لیستی حزب و لایەنەکان بدرێت کە لە ژمارە 101 ەوە دەستپێدەکات، هاوکات کۆمسیۆن بەردەوامە لەکارەکانی و پابەندە بە خشتەی کاتی بەڕێوەچونی پرۆسەی هەڵبژاردن لە وادەی خۆیدا و سەربەخۆیی خۆی لەنێوان حزب و هاوپەیمانێتییەکاندا پاراستوەو بەپێی یاسا و بڕیارەکان کارەکانی هەڵبژاردنی خولی شەشەمی پەرلەمانی کوردستان جێبەجێ دەکات"، جومانە غەلای وای وت.

یەکێتی ناوی کاندیدەکانی پێشکەش بە کۆمسیۆن کردووە

یەکێک لەو 10 حزبەی ناوی کاندیدەکانی پێشکەش کردووە یەکێتیی نیشتمانیی کوردستانە و لێپرسراوی مەکتەبی هەڵبژاردنی یەکێتیش دەڵێت: "لەهەر چوار بازنەکە کاندیدەکانمان پێشکەش بە کۆمسیۆن کردووە".

رزگار حاجی حەمە لێپرسراوی مەکتەبی هەڵبژاردنی یەکێتی لە لێدوانێکی تایبەتدا بە وێبسایتی رەسمیی یەکێتیی نیشتمانیی کوردستان PUKMEDIA ی راگەیاند :" ئەمرۆ بەڕەسمی لیستی کاندیدەکانمان لە سنوری هەرچوار بازنەی (سلێمانی ، هەولێر ، دهۆک ،هەڵەبجە ) پێشكەش بە کۆمسیۆنی باڵای سەربەخۆیی هەڵبژاردنەکانی عيراق کردو ئێمە ئامادەین بۆ هەڵبژاردنی پەرلەمانی کوردستان".

تەنها دوو هاوپەیمانێتی و 10 حزب ناویان تۆمارکردووە

بۆ هەڵبژاردنی پەرلەمانی کوردستان تێکڕا 20 حزب و 2 هاوپەیمانێتی و 62 کاندیدی سەربەخۆ بۆ بەشداریکردن لە پرۆسەکە تۆمارکراون، کە لەبازنەکانی هەڵبژاردن بەشداردەبن، بەڵام تائێستا تەنها دوو هاوپەیمانێتی و 10 حزب و 54 کاندیدی سەربەخۆ ناویان تۆمار کردووە.

PUKMEDIA