دامه‌زراوه‌ی سه‌رۆك جه‌لال تاڵه‌بانی: ئه‌نفال هه‌وڵی سڕ‌ینه‌وه‌ی نه‌ته‌وه‌ی كورد بوو

PUKMEDIA

روفاتی ئەنفالکراوان

سه‌رۆكی دامه‌زراوه‌ی سه‌رۆك جه‌لال تاڵه‌بانی له‌ساڵیادی كاره‌ساتی ئه‌نفالدا په‌یامێك بڵاوده‌كاته‌وه‌و ئاماژه‌ بۆ ئه‌وه‌ ده‌كات:" تاوانی ئه‌نفال؛ ساڕ‌ێژنه‌بوونی برینێكه‌ له‌سه‌ر جه‌سته‌ی هه‌موو تاكێكی كورد، ئه‌نفال كۆمه‌ڵكوژی و زینده‌به‌چاڵ كردن بوو، هه‌ر تاوانێك نه‌بوو دژ به‌ كورد، به‌ڵكو هه‌وڵی سڕ‌ینه‌وه‌ی نه‌ته‌وه‌ی كورد و قات و قڕ‌كردنی بوو".

ده‌قی په‌یامه‌كه‌..

له‌یادی ٣٦ ساڵه‌ی تاوانی ئه‌نفال، به‌ په‌ژاره‌ و خه‌م و ئازاره‌وه‌ یادی قۆناغه‌كانی تاوانی ئه‌نفال ده‌كه‌ینه‌وه‌ كه‌ رژێمی به‌عس دژی به‌ گه‌لی كوردی ئاشتیخواز به‌ هه‌شت قۆناغ به‌رپایكرد كه‌ بووه‌ هۆی شه‌هیدبوونی (١٨٠) هه‌زار هاووڵاتی سڤیلی (منداڵ، گه‌نج و پیر)ـــی كورد و خاپوركردنی زیاتر له‌ پێنج هه‌زار گوند، له‌م بۆنه‌ غه‌مباره‌دا سه‌ری رێز و نه‌وازش بۆ گیانی پاكی سه‌رجه‌م شه‌هیدان، قوربانییان و كه‌سوكاری خانه‌واده‌ی ئه‌م تاوانه‌ قێزه‌ونه‌ دژ به‌ مرۆڤایه‌تییه‌ داده‌نوێنین.

تاوانی ئه‌نفال؛ ساڕ‌ێژنه‌بوونی برینێكه‌ له‌سه‌ر جه‌سته‌ی هه‌موو تاكێكی كورد، ئه‌نفال كۆمه‌ڵكوژی و زینده‌به‌چاڵ كردن بوو، هه‌ر تاوانێك نه‌بوو دژ به‌ كورد، به‌ڵكو  هه‌وڵی سڕ‌ینه‌وه‌ی نه‌ته‌وه‌ی كورد و قات و قڕ‌كردنی بوو له‌ هه‌مان كاتدا ته‌حدییه‌ك بوو به‌ به‌رچاوی هه‌موو جیهانه‌وه‌.

جێ دڵخۆشییه‌ له‌ ساڵی ٢٠٠٨  دادگای باڵای تاوانه‌كانی عیراق كه‌یسی ئه‌نفالی وه‌ك تاوانی جه‌نگ و  دژه‌ مرۆڤایه‌تی  ناساند، ده‌بێت كۆمه‌ڵگه‌ی نێوده‌وڵه‌تی و لایه‌نه‌ پیوه‌ندیداره‌كان له‌سه‌ر ئاستی جیهان ئه‌م تاوانه‌ به‌ جینۆساید بناسێنن و هه‌وڵی ئه‌وه‌ بده‌ن ئه‌م جینۆسایده‌ به‌رانبه‌ر به‌ كورد و هه‌ر نه‌ته‌وه‌یه‌كی دیكه‌ دووباره‌ نه‌بێته‌وه‌ له‌ هه‌مان كاتدا ده‌بێت حكومه‌تی فیدراڵی عیراق ئاوڕ‌ێكی جددی له‌ كه‌سوكاری قوربانییانی ئه‌نفال بداده‌ته‌وه‌ و قه‌ره‌بووییان بكاته‌وه‌.

دروود بۆ گیانی پاكی شه‌هیدانی ئه‌نفال و خۆڕ‌اگریی كه‌سوكاریان.

باڵیۆز د. محه‌مه‌د سابیر
سه‌رۆكی دامه‌زراوه‌ی سه‌رۆك جه‌لال تاڵه‌بانی

PUKMEDIA